ఇరగదీసిన అల్లు అర్జున్.. పూజా అందాలు.. బన్నీ స్టెప్పులు: 'సామజవరగమన' వీడియో హల్చల్

'అల.. వైకుంఠపురములో' సెన్సేషన్స్

అల్లు అర్జున్- త్రివిక్రమ్ శ్రీనివాస్ క్రేజీ కాంబినేషన్‌లో రాబోతున్న 'అల.. వైకుంఠపురములో' సినిమా విడుదలకు ముందే భారీ హైప్ తెచ్చుకుంటోంది. సంక్రాంతి కానుకగా జనవరి 12న విడుదల కానున్న ఈ సినిమా నుంచి ఇప్పటికే విడుదలైన అన్ని పాటలు రికార్డులను తిరగరాస్తూ సెన్సేషన్స్ క్రియేట్ చేశాయి.

సామజవరగమన.. రాములో రాములా

ముఖ్యంగా సామజవరగమన, రాములో రాములా పాటలు దేనికవే ప్రత్యేకంగా నిలిచి 'అల.. వైకుంఠపురములో' సినిమాపై భారీ అంచనాలను క్రియేట్ చేశాయి. సామజవరగమన పాట మెలోడీ బీట్‌తో రికార్డులు సృష్టించగా, రాములో రాములా పాట ఫాస్ట్ బీట్‌తో సంచలనాలకు తెరలేపింది. మొత్తానికి ఈ రెండు పాటలు సిల్వర్ స్క్రీన్‌పై ఎప్పుడెప్పుడు చూడాలా అని ఆతృతగా ఉన్నారు ప్రేక్షకులు.

సామజవరగమన వీడియో ప్రోమో..

సరిగ్గా ఈ తరుణంలో సామజవరగమన వీడియో ప్రోమో రిలీజ్ చేశారు మేకర్స్. 59 సెకన్ల నిడివితో రిలీజ్‌ అయిన ఈ ప్రోమో వావ్‌ అనిపించేలా ఉంది. ఇందులో స్టైలిష్ స్టార్ అల్లు అర్జున్ స్టెప్పులు, అందాల భామ పూజా హెగ్డే తళుక్కులు చూసి ఎంజాయ్ చేస్తోంది ప్రేక్షక లోకం. పారిస్‌లోని అందమైన లొకేషన్స్‌లో ఈ పాటను చిత్రీకరించారు.

ఖర్చు తెలిస్తే షాక్..

ఇక ఈ పాట కోసం 'అల.. వైకుంఠపురములో' టీమ్ పెట్టిన ఖర్చు తెలిస్తే షాక్ కావాల్సిందే. కేవలం ఈ ఒక్క పాట కోసమే దాదాపు ఆరు కోట్ల రూపాయలు వెచ్చించిందట చిత్రయూనిట్. మొత్తానికైతే ఖర్చుకు తగ్గట్టుగా ఈ పాట హంగామా చేసింది. ఆడియోతో పాటు వీడియో కూడా ఆకట్టుకోవడంతో ఇదే పాట సినిమాలో హైలైట్ కావొచ్చని తెలుస్తోంది.

భారీ ఎత్తున ప్రీ రిలీజ్..

ఇక ఈ సినిమా ప్రీ రిలీజ్ ఈవెంట్ భారీ ఎత్తున ప్లాన్ చేసింది చిత్రయూనిట్. జనవరి 6వ తేదీన సాయంత్రం 5 గంటలకు హైదరాబాద్ లోని పోలీస్ గ్రౌండ్స్‌లో 'అల.. వైకుంఠపురములో' ప్రీ రిలీజ్ ఈవెంట్ ఘనంగా జరగనుంది.

'అల.. వైకుంఠపురములో' విశేషాలు

త్రివిక్రమ్ శ్రీనివాస్- అల్లు అర్జున్ కాంబోలో హ్యాట్రిక్ మూవీగా రాబోతున్న 'అల.. వైకుంఠపురములో' సినిమాలో బన్నీ సరసన పూజా హెగ్డే హీరోయిన్‌గా నటించింది. టబు, రాజేంద్రప్రసాద్, సచిన్ ఖేడ్‌కర్, తనికెళ్ళ భరణి, మురళీ శర్మ, సముద్ర ఖని, సునీల్, నవదీప్, సుశాంత్, నివేతా పేతురాజ్, బ్రహ్మాజీ, అజయ్, రాహుల్ రామకృష్ణ ఇతర పాత్రలు పోషించారు. థమన్ బాణీలు కట్టారు.