Hunt Trailer: ప్రభాస్ తో మొదలైన హంట్.. హైలెట్ గా సుధీర్ బాబు యాక్షన్ స్టంట్స్

ప్రభాస్ చేతులమీదుగా..

నైట్రో స్టార్ సుధీర్ బాబు హీరోగా భవ్య క్రియేషన్స్ పతాకంపై వి. ఆనంద ప్రసాద్ నిర్మించిన సినిమా 'హంట్'. ఈ సినిమాకు మహేష్‌ దర్శకత్వం వహించారు. ఈ సినిమా నుంచి ఇప్పటికే పలు అప్డేట్స్ ఇస్తూ సినిమాపై క్యూరియాసిటీ పెంచే ప్రయత్నం చేశారు. ఇప్పుడు తాజాగా ఈ సినిమా ట్రైలర్ ను రిలీజ్ చేశారు. హంట్ సినిమా ట్రైలర్ ను పాన్ ఇండియా స్టార్ ప్రభాస్ చేతులమీదుగా విడుదల చేశారు. క్రైమ్ ఇన్వెస్టిగేషన్ థ్రిల్లర్ గా హంట్ మూవీ ఉన్నట్లు సినిమా ట్రైలర్ చూస్తుంటే తెలుస్తోంది. ఒక పోలీస్ ఆఫీసర్ మర్డర్ చుట్టూ హంట్ కథ తిరుగుతున్నట్లు అర్థమవుతోంది.

యాక్షన్ ప్రియులకు ట్రీట్..

ట్రైలర్ లోకి వెళితే.. అర్జున్ అనే పోలీస్ ఆఫీసర్ కి కారు యాక్సిడెంట్ జరిగి గతం మరిచిపోతాడు. దీంతో అతను విచారించాల్సిన ఒక ముఖ్యమైన కేసు మధ్యలోనే ఆగిపోతుంది. ఆ కేస్ కు సంబంధించిన పూర్తి వివరాలు తెలిసింది కేవలం అర్జున్ కి మాత్రమే. ఈ క్రమంలో ఆ కేసును ఎలాగైన పూర్తి చేయాలని పై అధికారి (హీరో శ్రీకాంత్) ఆదేశిస్తాడు. ఇలా మెమోరీ లాస్ అయిన పోసీస్ ఆఫీసర్ అర్జున్ ఆ కేసు కోసం ఏం చేశాడు.. ఎలా ఇన్వెస్టిగేట్ చేశాడనేది ట్రైలర్ లో చూపించారు. పూర్తిగా యాక్షన్ సన్నివేశాలతో నిండిపోయిన ఈ ట్రైలర్ చూస్తుంటే యాక్షన్ ప్రియులకు మంచి ట్రీట్ ఇచ్చేలా కనిపిస్తోంది. బ్యాక్ గ్రౌండ్ మ్యూజిక్ కూడా ఆకట్టుకునే విధంగా ఉంది.

హాలీవుడ్ స్టంట్ మాస్టర్స్..

ఇక ప్రభాస్ ట్రైలర్ తో స్టార్ట్ చేసిన ఈ హంట్ సినిమా రిపబ్లిక్ డే సందర్భంగా జనవరి 26న విడుదల కానుంది. ఈ సినిమాలో సుధీర్ బాబుతో పాటు సీనియర్ హీరో శ్రీకాంత్, ప్రేమిస్తే భరత్ పోలీస్ ఆఫీసర్లుగా నటిస్తున్నారు. అలాగే ఇందులో మౌనిక రెడ్డి, మైమ్ గోపి, జిల్ కబీర్ దుహాన్ సింగ్, గోపరాజు రమణ, సుపూర్ణ మల్కర్, సంజయ్ స్వరూప్ తదితరులు నటిస్తున్నారు. ఈ సినిమాకు మార్వెల్ చిత్రాలకు పనిచేసిన రేనాడో ఫవెరో, బ్రయాన్ విజియర్ స్టంట్స్ కంపోజ్ చేశారు. ప్రస్తుతం వాళ్లు హాలీవుడ్ యాక్షన్ ఫిల్మ్ జాన్ విక్ 4కి వర్క్ చేస్తున్నారు. రేనాడో ఫవెరో, బ్రయాన్ విజియర్ కంపోజ్ చేసిన యాక్షన్ సన్నివేశాలు హంట్ సినిమాకు ప్రధాన ఆకర్షణగా నిలుస్తాయని దర్శకనిర్మాతలు తెలిపారు. ట్రైలర్ విడుదల సందర్భంగా ప్రభాస్ కు ధన్యవాదాలు తెలియజేశారు నిర్మాత వి. ఆనంద్ ప్రసాద్.