హోమ్

బాలీవుడ్

బాలీవుడ్ యువ హీరోయిన్, దంగల్ ఫేం ఫాతిమా సనా షేక్ ఇంట్లో స్వల్ప అగ్ని ప్రమాదం చోటుచేసుకొన్నది. గురువారం రాత్రి ఫాతిమా సానా ఇంట్లో మంటలు చెలరేగగానే ముంబై అగ్నిమాపక దళం విభాగానికి సమాచారం అందించగా.. వారు వెంటనే రంగంలోకి దిగి భారీ ప్రమాదాన్ని నివారించినట్టు తెలిసింది.

తన ఇంటిలో జరిగిన అగ్ని ప్రమాదానికి సంబంధించిన వివరాలను ఫాతీమా సనా షేక్ తన ఇన్స్‌టాగ్రామ్ అకౌంట్ ద్వారా అందించారు. ఇంట్లో మంటలు కనిపించగానే వెంటనే ఫైర్ విభాగానికి సమాచారం అందించాం. ఆ సమయంలో మేమంతా భయాందోళనలకు గురయ్యాం. ఫైర్ డిపార్ట్‌మెంట్ ఉద్యోగులు సరైన సమయంలో సంఘటనా స్థలానికి చేరుకొని సహాయం కార్యక్రమాల్లో నిమగ్నమయ్యారు. ఈ సందర్భంగా ఫైర్ స్టేషన్ డిపార్ట్‌మెంట్‌కు థ్యాంక్స్ అంటూ వెల్లడించారు.

ఫాతిమా సనా షేక్ కెరీర్ విషయానికి వస్తే.. అమీర్ ఖాన్ నటించి, నిర్మించిన దంగల్ చిత్రం ద్వారా 2016లో బాలీవుడ్‌లోకి ప్రవేశించారు. ఆ తర్వాత అమితాబ్ నటించిన థగ్స్ ఆఫ్ హిందూస్థాన్ చిత్రంలో కనిపించారు.

ప్రస్తుతం సూరజ్ పే మంగళ్ భారీ చిత్రంలో మనోజ్ బాజ్‌పేయ్, దిలిజిత్ దోసాంజ్‌తో కలిసి నటిస్తున్నారు. అంతేకాకుండా రాజ్ కుమార్ రావు నటిస్తున్న లుడో చిత్రంలో కూడా నటిస్తున్నారు. ఈ చిత్రానికి అనురాగ్ బసు దర్శకుడు. దంగల్ ఫేం సన్యా మల్హోత్రా, అభిషేక్ బచ్చన్ నటిస్తున్నారు.