"నా వల్లే సూపర్ స్టార్ అయ్యాడు, కానీ అవమానం జరిగింది... నేనిచ్చిన షాక్‌తో డౌన్"

అభిజీత్ సంచలన వ్యాఖ్యలు

ముంబయిలో జరిగిన ఇండియా టుడే సఫాయ్‌గిరి సమ్మిట్‌ అండ్ అవార్డ్స్‌ 2018 కార్యక్రమంలో పాల్గొన్న అభిజీత్ తాను ఎందుకు షారుక్ ఖాన్ సినిమాలకు పాటలు పాడటం ఆపేశానో వెల్లడించారు. 2009లో వచ్చిన షారుక్ మూవీ ‘బిల్లు బార్బర్' తర్వాత నుండి అభిజీత్ అతడి సినిమాలకు పాడటం లేదు.

నేనిచ్చిన షాక్‌తో

నా పాటలతో ఎందరినో సూపర్‌స్టార్లను చేశాను. నేను షారుక్‌ సినిమాలకు పాటలు పాడుతున్నంత వరకు అతనో రాక్‌స్టార్. ఎప్పుడైతే అతని కోసం పాడటం మానేశానో అతని స్థాయి లుంగి డాన్స్ స్థాయికి పడిపోయింది.... అని అభిజీత్ వెల్లడించారు.

నాకు అవమానం జరిగింది

‘మైహూనా' సినిమాకు నేను షారుక్ కోసం పాటలు పాడాను. టైటిల్స్‌లో స్పాట్‌బాయ్స్‌ దగ్గర నుండి అందరి పేర్లు వేశారు. కానీ థియేటర్లలో ప్రేక్షకులు లేచిపోయే సమయంలో నా పేరు వేశారు. ‘ఓం శాంతి ఓం' సినిమా సమయంలో కూడా ఇలాగే జరిగింది. అది నేను అవమానంగా ఫీలయ్యాను... అని అభిజీత్ తెలిపారు.

నాకూ ఆత్మాభిమానం ఉంది

వరుసగా అలా జరుగడంతో ఆత్మాభిమానం దెబ్బతిన్నట్లు అనిపించింది. అలా అని నేను ఎక్కడా నా అసంతృప్తి చూపించలేదు. నా పేరు ముందు ఎందుకు వేయలేదు? అని ప్రశ్నించలేదు, అదే విధంగా నా పేరు వేయండి అని నేను అడగలేదు. ఎందుకంటే నాకూ ఆత్మాభిమానం ఉంది అని అభిజీత్ భట్టాచారి వ్యాఖ్యానించారు.

బాలీవుడ్‌కే పరిమితం కాదు

నన్ను నేను ఎప్పుడూ ఇండియన్ మ్యూజిక్ ఇండస్ట్రీకి చెందిన వాడిగా చెప్పుకుంటాను... బాలీవుడ్ ఇండస్ట్రీకి సంబంధించిన వాడిగా చెప్పుకోను అని ఈ సందర్భంగా అభిజీత్ భట్టాచార్య స్పష్టం చేశారు.