‘సుప్రీమ్‌’ అనీల్ రావిపూడి తదుపరి చిత్రం ఆ హీరోతో?

హైదరాబాద్: కళ్యాణ్ రామ్ తో చేసిన తొలి సినిమా 'పటాస్‌'తోనే అందరినీ ఆకట్టుకొన్నాడు అనిల్‌రావిపూడి. తర్వాత సాయి ధరమ్ తేజ తో చేసిన ఇప్పుడు 'సుప్రీమ్‌' కూడా హిట్ అనిపించుకొంది. అంతేకాదు ఈ రెండు సినిమాలతో కమర్షియల్‌ కథల్ని తెరపైకి సమర్దవంతంగా తీసుకువచ్చి హిట్ కొట్టగలడనే పేరు సైతం వ్చచింది.

దాంతో టాలీవుడ్ హీరోలందరి దృష్టి ఈ యంగ్ డైరక్టర్ పై పడింది. అందుతున్న సమాచారం ప్రకారం తాజాగా రవితేజ కూడా అనిల్‌కి ఓ బంపర్‌ ఆఫర్‌ ఇచ్చినట్టు తెలుస్తోంది. సుప్రీమ్ హిట్టయ్యాక పోన్ చేసి.... 'మంచి కథ ఉంటే చెప్పు.. కలసి చేద్దాం' అని అన్నారు.

దాంతో ప్రస్తుతం అనిల్‌రావిపూడి ఇప్పుడు రవితేజ కోసం కథ వండే ప్రయత్నంలో ఉన్నాడని వినికిడి. మరో ప్రక్క రవితేజ ప్రస్తుతం చక్రి అనే నూతన దర్శకుడితో కలసి ఓ ప్రాజెక్టు పట్టాలెక్కించే పనిలో ఉన్నాడు. ఆ తరవాత అనిల్‌ సినిమా ఉండొచ్చన్న వార్తలు వినిపిస్తున్నాయి.

అనిల్‌ కూడా స్టార్ హీరోలపై దృష్టి పెట్టాడు. నందమూరి బాలకృష్ణ కోసం ఓ కథ సిద్ధం చేశాడని తెలుస్తోంది. 'బాలయ్యగారితో ఓ సినిమా తప్పకుండా ఉంటుంది. అయితే అదెప్పుడన్నది చెప్పలేను' అంటున్నాడు అనిల్‌ రావిపూడి.