తమన్నాపై మోజు పడ్డ చిరంజీవి.. కోరిక తీర్చిన రాంచరణ్

తమన్నాతో చిరు

రచ్చ సినిమా సక్సెస్ మీట్‌ హైదరాబాద్‌లో జరిగితే చిరంజీవిగారు ముఖ్య అతిథిగా హాజరయ్యారు. ఆ సందర్భంగా నాన్నగారు మాట్లాడుతూ.. నేను మళ్లీ సినిమాల్లోకి వస్తే తమన్నాతో కలిసి నటిస్తాను అని అన్నారు. అప్పుడు ఏంటి నాన్న తమన్నా మీతో నటించడం ఏమిటి అని అడిగా. ఆమె వయసు.. మీ సీనియారిటీ మ్యాచ్ కాకపోవచ్చు అని అన్నాను. దాంతో ఆ సమయానికి అన్నీ చక్కగా సెట్ అయిపోతాయి. నువ్వే చూడు అంటూ చిరంజీవి గారు అన్నారు.

అందుకే సైరాలో

చిరంజీవి గారు తమన్నాతో కలిసి నటించాలని అన్నారు కాబట్టే.. సైరాలో ఆమెను నాన్న పక్కన హీరోయిన్‌గా తీసుకొన్నాను. తమన్నా పక్కన నాన్న చాలా యంగ్‌గా కనిపించారు. సినిమా ఇండస్ట్రీలో ఏదైనా జరుగుతాయని చెప్పడానికి ఇదో ఉదాహరణ. చిరంజీవి, తమన్నా జంట తెరపైనా బాగుంది. నా పక్కన కంటే చిరంజీవి పక్కన ఇంకా బాగుంది అని రాంచరణ్ అన్నారు.

రాంచరణ్ ఒప్పుకోలేదు

రాంచరణ్ మాట్లాడిన అనంతరం చిరంజీవి కూడా తమన్నా గురించి ప్రస్తావించారు. తమన్నాతో నటించాలని రచ్చ ఫంక్షన్‌లో చెప్పాను. అప్పుడు రాంచరణ్ ఒప్పుకోలేదు. ఖైదీ నంబర్ 150 తర్వాత స్క్రీన్ మీద నన్ను చూసి తన నిర్ణయాన్ని మార్చుకొన్నట్టు ఉన్నారు. అందుకే సైరాలో నాకు మంచి జోడిగా ఉంటుందని తమన్నాను ఎంపిక చేశారు. ఆమెతో కలిసి నటించాలనే కోరికను రాంచరణ్ తీర్చాడు అని చిరంజీవి అన్నారు.

తండ్రి కలను సాకారం చేసే

సాధారణంగా సినిమా పరిశ్రమలో కొడుకుల కలను సాకారం చేసే తండ్రులను చూశాం. కానీ తండ్రి కలను పూర్తి చేస్తున్న కొడుకును నేను చూస్తున్నాను. ఖర్చుకు వెనుకాడకుండా సైరాను రాంచరణ్ నిర్మించడం ఆయన అభిరుచికి, నాపై ఉన్న ప్రేమకు నిదర్శనం. ఈ సినిమా ప్రపంచవ్యాప్తంగా అక్టోబర్ 2 గాంధీ జయంతి రోజున రిలీజ్ అవుతున్నది అని చిరంజీవి అన్నారు. ఈ సినిమా చిరంజీవి కెరీర్‌లోనే అతిపెద్ద రిలీజ్ కావడం గమనార్హం.