వేయి స్తంభాల గుడిలో అనుష్క, రానా హంగామా(ఫోటోలు)

కాకతీయుల చరిత్ర ఆధారంగా రూపొందుతున్న రుద్రమదేవి చిత్రంలో రుద్రమదేవిగా ప్రధాన పాత్ర పోషించనున్న కథానాయిక అనుష్క, చాళుక్య వీరభద్రుడిగా నటించనున్న కథా నాయకుడు రాణా, చిత్రానికి దర్శకత్వం వహించడంతో పాటు నిర్మాతగా వ్యవహరిస్తున్న గుణశేఖర్‌ తమ బృందంతో కలిసి వేయిస్తంభాల గుడికి చేరుకున్నారు.

ముందుగా బస్సులో గుణశేఖర్‌ ఆలయానికి వచ్చారు. తరువాత స్కార్పియో వాహనాలలో రాణా, అనుష్క ఒకరి తరువాత ఒకరు వచ్చారు.

సరస్వతీదేవి పుట్టినరోజును పురస్కరించుకుని వసంత పంచమి సందర్భంగా సరిగ్గా మధ్యాహ్నం 12.24 గంటల సమయంలో చిత్ర దర్శకుడు గుణశేఖర్‌ కథానాయకుడు రాణా, కథా నాయిక అనుష్కతో కలిసి రుద్రేశ్వరస్వామి సన్నిధిలో రుద్రమదేవి చిత్ర ప్రారంభ పూజలు నిర్వహించారు.

ఆలయ ప్రధాన అర్చకుడు గంగు ఉపేంద్రశర్మ లఘున్యాసపూర్వక పంచామృత అభిషేకం జరిపారు. రుద్రమదేవి చిత్రం విజయవంతం కావాలని, లక్ష్మిదేవి కటాక్షం లభించాలని మారేడు దళాలతో పూజలు చేశారు. కథానాయకి అనుష్క స్వయంగా రుద్రేశ్వరుడికి హారతి ఇచ్చారు.

అనంతరం ఆలయ నాట్య మండపంలో సంప్రదాయం ప్రకారం దర్శకుడు గుణశేఖర్‌, కథానాయిక అనుష్క, కథానాయకుడు రాణాకు ఆలయ ప్రధాన అర్చకుడు గంగు ఉపేంద్రశర్మ తీర్థ ప్రసాదాలు, శేషవస్త్రాలు అందజేశారు.

రుద్రమదేవి చిత్రం ప్రారంభ పూజలకు నటి అనుష్క, నటుడు రాణా, దర్శకుడు గుణశేఖర్‌ వచ్చినట్లు తెలియగానే అభిమానులు పెద్దసంఖ్యలో వేయిస్తంభాల గుడికి తరలివచ్చారు.

పూజలు చేసిన సమయంలో అనుష్క, రాణాను చూడటానికి ఆలయం లోపలకు చొచ్చుకొచ్చారు. పూజలు చేశాక ఆలయ నాట్య మండపంలోకి వచ్చిన తారల బృందాన్ని తమ సెల్‌ కెమెరాల్లో బంధించడానికి తీవ్రస్థాయిలో పోటీపడ్డారు.

రాణాతో కరచాలనం కోసం ప్రయత్నించారు. మీడియాతో రాణా మాట్లాడుతున్నపుడు కేరింతలు కొట్టారు. చివరకు వెళ్లిపోతున్న సమయంలో రాణా తన అభిమానులతో కరచాలనం చేశారు.

చిత్ర బృందం మీడియాతో మాట్లాడుతున్న సమయంలో అభిమానులు ఆలయంలోకి తోసుకునిరావడంతో కొంత తోపులాట జరిగింది.

రుద్రమదేవిగా నటిస్తుండటం తనకు గర్వంగా ఉందని, అరుంధతి చిత్రం కంటే ఎక్కువగా రుద్రమదేవి చిత్రం ద్వారా తనకు మంచిపేరు వస్తుందని అనుష్క పేర్కొన్న సమయంలో అభిమానుల చప్పట్లు, కేరింతలతో ఆలయం దద్దరిల్లింది.

దర్శకుడు గుణశేఖర్‌ మాట్లాడుతూ రుద్రేశ్వరాలయంలో నిర్మించిన పది సినిమాల్లో ఎనిమిది విజయవంతంగా నడిచాయని, వీటిలో వర్షం సినిమా ఒకటని అన్నారు. వర్షం సినిమా తెలుగు, తమిళం భాషల్లో వంద రోజులు ఆడటం గొప్ప విషయమని చెపుతూ రుద్రమదేవి చిత్రం కూడా విజయవంతం కాగలదని ఆశిస్తున్నట్లు తెలిపారు.

వేయిస్తంభాల దేవాలయంలో చివరగా ఎనిమిదేళ్ల కిందట వర్షం సినిమా షూటింగ్‌ జరిగింది. తరువాత మళ్లీ ఇన్నాళ్లకు రుద్రమదేవి సినిమా చిత్రీకరణ ప్రారంభ పూజలు ఇక్కడ జరగడం విశేషం.

అభిమానుల తాకిడి పెరగడంతో కథానాయిక అనుష్క, కథానాయకుడు రాణా ముందుగానే స్కార్పియో వాహనంలో వేయిస్తంభాల గుడి నుంచి వెళ్లిపోయారు.

తరువాత దర్శకుడు గుణశేఖర్‌ తమ చిత్ర బృందంతో కలిసి బస్సులో హైదరాబాద్‌కు బయల్దేరారు. రుద్రమదేవి చిత్ర ప్రారంభ పూజలకు ముందు ఆలయ అర్చకులు సుప్రభాత సేవ, మూలగణపతికి పంచామృత అభిషేకం నిర్వహించారు. సరస్వతీదేవి పేర దక్షణమూర్తి మహాశివుడికి ప్రత్యేక రుద్రాభిషేకాలు చేసి విద్యార్థుల పుస్తకాలకు పూజలు జరిపారు.

రానా మాట్లాడుతూ -‘‘పౌరాణిక, చారిత్రాత్మక పాత్రలంటే చాలా ఇష్టం. ఈ చిత్రంలో చాళుక్య వీరభద్రునిగా నటించడం చాలా ఆనందంగా ఉంది. నటునిగా ఇది నాకు ఓ ఛాలెంజ్'' అన్నారు.