ఎన్టీఆర్ సినీకార్మిక సంఘం ఏర్పాటు, బాలయ్య హ్యాపీ

By Bojja Kumar

Updated: Wednesday, November 20, 2013, 17:35 [IST]

హైదరాబాద్: ఆంధ్రప్రదేశ్ ఫిల్మ్ ఎంప్లాయీస్ యూనియన్ నూతన భవనాన్ని హైదరాబాద్‌లో ఏర్పాటు చేసారు. ఈ భవనానికి 'ఎన్టీఆర్ సినీకార్మిక సంఘం'గా నామకరణం చేసారు. ఈ సందర్భంగా ఏర్పాటు చేసిన ప్రారంభోత్సవ కార్యక్రమానికి దర్శకరత్న దాసరి నారాయణరావు, మూవీ మొఘల్ డి రామానాయుడు, ప్రముఖ నటి జమున, నందమూరి హీరో బాలకృష్ణ హాజరయ్యారు.

ఈ సందర్భంగా బాలకృష్ణ మాట్లాడుతూ...ఏ రంగానికైనా కార్మికులే ఆయువు పట్టు, బలం, పునాది అని వ్యాఖ్యానించారు. మహా నటుడు, మా నాన్నగారు ఎన్టీఆర్ పేరు పెట్టడం ఎంతో సంతోషంగా ఉందని, ఆయన డ్రైవర్ స్థాయి నుంచి ఏ స్థాయి వారికైనా ఒకే రకమైన గౌరవం, మర్యాద ఇచ్చేవారని గుర్తు చేసుకున్నారు.

సినీ కార్మికులకు ఏ అవసరం వచ్చినా మేము ఉన్నామని బాలకృష్ణ భరోసా ఇచ్చారు. నాన్న గారి పట్ల అభిమానంతో ఆయన పేరు పెట్టింనందుకు సినీ కార్మికులందరికీ కృతజ్ఞతలు తెలుపుతున్నట్లు బాలకృష్ణ వెల్లడించారు. ఈ కార్యక్రమానికి హాజరైన ప్రముఖ నిర్మాత డి రామానాయుడు భవన నిర్మాణానికి తన వంతు విరాళంగా రూ. 1 లక్ష అందిస్తున్నట్లు ప్రకటించారు.