అప్పుడు ఆత్మహత్య చేసుకోవాలనిపించేది: ఏఆర్ రెహమాన్

ఆత్మహత్య చేసుకోవాలనుకున్నాను

నాకు 25 సంవత్సరాల వయసు వచ్చే వరకు ప్రతి రోజూ నా మదిలో ఆత్మహత్య చేసుకోవాలనే ఆలోచన మెదిలేది. మా నాన్న మరణం తర్వాత అంతా శూన్యం అనిపించింది. ఆ తర్వాత ఎన్నో పరిణామాలు చోటు చేసుకున్నాయి. దీంతో ఆత్మహత్య చేసుకోవాలనే ఆలోచన కలిగేది అని రెహమాన్ బయోగ్రఫీలో చెప్పుకొచ్చారు.

ఆ పరిణామాలే నన్ను భయం లేనివాడిగా మార్చాయి

అయితే నాన్న మరణం తర్వాత కొన్ని పరిణామాలు నన్ను భయం లేనివాడిగా మార్చాయి. ప్రతి మనిషికి చావు వస్తుంది. అయితే ఆలోపే మనం చేయాలనుకున్నవి చేయాలి. అలాంటపుడు మనం దేనికైనా ఎందుకు భయపడాలి? అనే ఆలోచన నాలో పెరిగింది అని రెహమాన్ అన్నారు.

ఏఆర్ రెహమాన్ బయోగ్రఫీ

‘నోట్స్ ఆఫ్ ఎ డ్రీమ్: ది ఆథరైజ్డ్ బయోగ్రఫీ ఆఫ్ ఏఆర్ రెహమాన్' బుక్ లాంచ్ ఈవెంట్ శనివారం జరిగింది. కృష్ణ త్రిలోక్ ఈ బయోగ్రఫీ రాశారు. ఇందులో పలు ఆసక్తికర విషయాలు వెల్లడించారు.

సంగీత వాయిద్యాలు అద్దెకిస్తూ...

రెహమాన్ తండ్రి ఆర్‌కె శేఖర్ ఫిల్మ్ స్కోర్ కంపోజర్. రెహమాన్ 9 ఏళ్ల వయసులో ఆయన మరణించారు. ఆ తర్వాత వారి కుటుంబం కొంతకాలం పాటు తమ వద్ద ఉన్న సంగీత వాయిద్యాలు అద్దెకిస్తూ జీవనం సాగించింది. ఇంట్లోనే సంగీత వాయిద్యాలు ఉండటంతో వాటిని వాయించడంలో రెహమాన్ ఆరితేరాడు.

మతం మారారు

మణిరత్నం ‘రోజా' సినిమా ద్వారా సంగీత దర్శకుడిగా ఎంట్రీ ఇవ్వడానికి ముందే రెహమాన్ కుటుంబం సూఫీ ఇస్లాం స్వీకరించారు. అంతకు ముందు రెహమాన్ పేరు దిలీప్ కుమార్. ఇలా రెహమాన్ జీవితానికి సంబంధించి చాలా విషయాలు ఈ బయోగ్రఫీలో ఉన్నాయి.