తప్పతాగి పోలీసు వాహనాన్నే గుద్దేసాడు: రామ్ చరణ్ మూవీ విలన్ అరెస్ట్!

By Bojja Kumar

Published: Sunday, August 28, 2016, 11:37 [IST]

చెన్నై: డ్రంక్ అండ్ డ్రైవ్ కేసులో నటుడు అరుణ్ విజయ్ అరెస్టయ్యాడు. తప్పతాగి వేగంగా కారు నడిపిన అతను ఏకంగా పోలీసు వాహనాన్నే గుద్దేయడంతో పోలీసులు అతన్ని అరెస్టు చేసారు. చెన్నైలోని నుంగంబాక్కం పోలీస్ స్టేషన్ ముందు ఈ ఘటన చోటు చేసుకుంది.

శుక్రవారం సాయంత్ర చెన్నైలోని ఓ స్టార్ హోటల్ లో జరిగిన వెడ్డింగ్ రిసెప్షన్ కు హాజరైన అరుణ్ విజయ్... అక్కడ జరిగిన పార్టీలో బాగా మద్యం సేవించాడు. పార్టీ ముగిసిన అనంతరం శనివారం తెల్లవారుఝామున 3.40 గంటలకు బిఎండబ్ల్యూ కారులో ఇంటికి బయల్దేరాడు ఈ క్రమంలో నుంగంబాక్కం పోలీస్ స్టేషన్ ముందు ఆగి ఉన్న పోలీస్ వాహనాన్ని ఢీ కొట్టాడు.

వెంటనే అతన్ని అరెస్టు చేసిన పోలీసులు అతన్ని విచారిస్తుండగా అరుణ్ విజయ్ తండ్రి విజయ్ కుమార్ అక్కడికి చేరుకున్నారు. కొడుకును విడిపించే ప్రయత్నాలు చేపట్టారు. అధికారులతో మాట్లాడిన అనంతరం సొంత పూచికత్తుపై అరుణ్ విజయ్ ను విడుదల చేసారు.

ప్రముఖ సీనియర్ నటుడు విజయ్ కుమార్ తనయుడైన అరుణ్ విజయ్.... సౌత్ సినిమాల్లో విలన్ పాత్రల్లో ఇప్పుడిప్పుడే ఎదుగుతున్నాడు. ఆ మధ్య వచ్చిన 'ఎంతవాడు గానీ' సినిమాలో అరుణ్ విజయ్ తెలుగు ప్రేక్షకులకు సుపరిచితం అయ్యాడు. తర్వాత రామ్ చరణ్ మూవీ 'బ్రూస్ లీ'లో విలన్ పాత్రలో నటించాడు.