2014లో మరణించిన సీనీ సెలబ్రిటీలు (ఫోటో ఫీచర్)

By Bojja Kumar

Updated: Wednesday, December 10, 2014, 14:20 [IST]

హైదరాబాద్: కాలం వేగంగా పరుగులు పెడుతోంది. ఈ ప్రయాణంలో కొన్ని సంతోషకరమైన సంఘటనలు, మరికొన్ని విషాద ఘటనలు. ప్రతి సంవత్సరం ఎంతో మంది తనలో కలుపుకుపోతున్న కాల చక్రం...ఈ సంవత్సరం కూడా పలువురు సినీ ప్రముఖులను తనలో విలీనం చేసుకుంది.

తెలుగు సినీ పరిశ్రమంలో నాలుగు రోజుల క్రితమే నిర్మాత నందమూరి జానకిరామ్ మరణంతో విషాద ఛాయలు చోటు చేసుకున్న సంగతి తెలిసిందే. టాలీవుడ్ తో పాటు బాలీవడు, హాలీవుడ్ లలో 2014 సంవత్సరం పలువురు సెలబ్రిటీలు కాలం చేసారు. మరికొన్ని రోజుల్లో 2014 సంవత్సరం ఎండ్ అవుతున్న నేపథ్యంలో ఈ సంవత్సరంలో కాలం చేసిన వారి గురించి తెలుసుకుందాం.

స్లైడ్ షోలో సెల్రబిటీల వివరాలు, ఫోటోలు....

నందమూరి జానకి రామ్

నందమూరి బిడ్డ, ఎన్టీఆర్ ఆర్ట్స్ పతాకంపై పలు సినిమాలు నిర్మిస్తున్న నందమూరి జానకి రామ్ ఇటీవల రోడ్డు ప్రమాదంలో మరణించారు.

దేవన్ వర్మ

ఖట్టా మీఠా, అంగూర్ చిత్రాల్లో హాస్యపాత్రలు పోషించిన బాలీవుడ్ నటుడు దేవన్ వర్మ(78) రెండు రోజుల క్రితం కన్నుమూశారు. గుండెపోటుతో ఆయన మరణించినట్లు కుటుంబసభ్యులు పేర్కొన్నారు. కొన్ని దశాబ్దాలపాటు హిందీ చిత్రసీమలో అనేక హాస్య పాత్రలు పోషించిన దేవన్ వర్మ తన నటనతో ఎందరో అభిమానుల్ని గెలుచుకున్నారు. బీఆర్ చోప్రా 1961లో నిర్మించిన ధర్మపుత్రతో కెరీర్‌ను మొదలుపెట్టిన వర్మ వందకు పైగా చిత్రాల్లో నటించారు.

సుచిత్ర సేన్

ప్రముఖ బెంగాలి నటి దాదాసాహెబ్ ఫాల్కే అవార్డు గ్రహీత సుచిత్రాసేన్ (82) (మూన్ మూన్ సేన్ తల్లి) ఈ సంవత్సరం జనవరి 17న కోల్‌కతాలోని బెల్లే వ్యూ ఆసుపత్రిలో మరణించారు. (పాత)దేవదాసు సినిమాలో ఆమె నటనకు ఉత్తమనటి అవార్డు అందుకొన్నారు. బెంగాలీ సినిమాలలో ఆమెకు ఒక ప్రత్యెక స్థానం, గౌరవం ఉంది. పశ్చిమ బెంగాల్ ప్రభుత్వం ఆమెను అత్యంత ప్రతిష్టాత్మకమయిన ‘వంగ విభేషణ్' బిరుదుతో సత్కరించింది.

జోహ్రా సెహగల్

బాలీవుడ్ ప్రముఖ నటి జోహ్రా సెహగల్ ఈ సంవత్సరం జులైలో కన్నుమూసారు. 102 యేళ్ల సెహగల్‌ 1912లో ఉత్తరప్రదేశ్ రాష్ట్రంలోని సహరన్ పూర్‌లో జన్మించారు. ఆమె 1946లో సినీ రంగ ప్రవేశం చేసిన ఆమె ప్రముఖ నటిగా పేరొందారు. 1998లో ఆమెను భారత ప్రభుత్వం పద్మశ్రీ, 2010లో పద్మ విభూషణ్‌ పురస్కారాలతో సత్కరించారు.

రవి చోప్రా

కొంత కాలంగా ఊపిరితిత్తుల కేన్సర్‌తో బాధపడుతున్న బాలీవుడ్‌ దర్శకుడు రవి చోప్రా (68) గత నెల మృతిచెందారు. ఆరోగ్య పరిస్థితి విషమించడంతో ముంబైలోని బ్రీచ్‌ క్యాండీ హాస్పిటల్‌లో చేరిన ఆయన మధ్యాహ్నం మూడు గంటలకు తుది శ్వాస విడిచారు.

ఈర్ల్ హాయెస్, స్టెఫానీ మోస్లీ

హాలీవుడ్ సెలబ్రిటీ కపులు ఈర్ల్ హాయెస్, స్టెఫానీ మెస్లీ డిసెంబర్ 8న అనుమానాస్పద స్థితిలో మరణించారు. వీరిని హత్య అని కొందరు, ఆత్మహత్య అనికొందరు అంటున్నారు. ఏ విషయం అనేది తేలాల్సి ఉంది.