అప్పులు చేసా, తిడతారని తెలుసు, ఆ భయంతో నా పేరు వేసుకోలేదు: మారుతి

అప్పులు చేసా

‘బస్టాప్' మూవీ ఆగిపోయిన తర్వాత రామ్ గోపాల్ వర్మ స్పూర్తితో 5డి కెమెరాతో ‘ఈ రోజుల్లో' సినిమా చేసాం. ఈ రోజుల్లో సినిమా చేసే సమయంలో చేతిలో డబ్బు కూడా లేదు. స్నేహితుల వద్ద రూ. 15 లక్షలు అప్పు చేసి తీసామని తెలిపారు మారుతి.

కన్నీళ్లు పెట్టుకున్నా

‘ఈరోజుల్లో' సినిమా విడుదల సమయంలో చాలా ఇబ్బందులు ఎదుర్కొన్నాం. టెక్నికల్ గా ఎన్నో సమస్యలు. ఆ పరిస్థితులు తట్టుకోలేక ఓ సందర్భంలో కన్నీళ్లు పెట్టుకున్నాం. మొత్తానికి సినిమా విడుదలై మంచి విజయం సాధించింది. మంచి లాభాలు తెచ్చింది. అలా వచ్చిన డబ్బుతో అప్పు తీర్చేసి ఆగిపోయిన ‘బస్టాప్' మూవీని మొదలు పెట్టామని మారుతి తెలిపారు.

తిడతారని తెలుసు

బస్టాప్ సినిమాలో ఉన్న అడల్ట్ కంటెంటుపై విమర్శలు వస్తాయని తెలుసు. ఈ సినిమా విడుదలైతే తిట్లు పడాల్సి వస్తుందని ముందుగానే అందుకు సిద్ధమయ్యాను. ఊహించినట్లుగానే తిట్లు వచ్చాయి, డబ్బులు కూడా వచ్చాయని మారుతి తెలిపారు.

దర్శకుడిని నేనే కానీ పేరు వేసుకోలేదు

‘ప్రేమకథా చిత్రమ్' సినిమాకు దర్శకత్వం నేను వహించాను. సినిమాకు సంబంధించిన ప్రతి షాటు నేను తీసాను. నిర్మాతను కూడా నేనే. అయితే దెయ్యంతో సినిమా అంటే ఎవరూ చూడరేమో అనే భయంతో నా పేరు వేసుకోకుండా... సినిమాటోగ్రాఫర్‌గా పని చేసిన జె ప్రభాకర్ రెడ్డి పేరును దర్శకుడిగా వేయాల్సి వచ్చిందని మారుతి తెలిపారు.