మహేష్‌తో చేసే అర్హత లేదు, గుడ్డిగా ఫాలోయింగే..

హైదరాబాద్ : సూపర్ స్టార్ ఫ్యామిలీ నుంచి 'ఎస్ఎంఎస్' చిత్రం ద్వారా హీరోగా పరిచయమైన సుధీర్ బాబు తాజాగా 'ప్రేమకథా చిత్రమ్' ద్వారా ప్రేక్షకుల ముందుకు రాబోతున్న సంగతి తెలిసిందే. కెమెరామెన్ జె.ప్రభాకర్‌రెడ్డి తొలిసారిగా దర్శకత్వం వహిస్తూ ఆర్.పి.ఎ. క్రియేషన్స్, మారుతీ టాకీస్ పతాకంపై సుదర్శన్‌రెడ్డి, మారుతి సంయుక్తంగా ఈ చిత్రాన్ని నిర్మిస్తున్నారు. నందిత కథానాయికగా నటిస్తున్న ఈ చిత్రం ఈనెల 7న విడుదలకు సిద్ధమైంది.

ఈ సందర్భంగా సుధీర్ బాబు మీడియాతో మాట్లాడుతూ సినిమా విశేషాలను వెల్లడించారు. యువతీ యువకులు ప్రేమలో మోసమోయి, ఆత్మహత్య చేసుకునే క్రమంలో ఈ కథ సరికొత్తగా మారుతుందని, నలుగురు వ్యక్తుల మధ్య జరిగే ఈ సినిమాలో ప్రతి పాత్రకు ప్రాధాన్యత ఉందని, ఓ మంచి కథనంతో దర్శకుడు చిత్రాన్ని తెరకెక్కించిన తీరు అందరికీ నచ్చుతుందని ఆయన తెలిపారు.

ఓ ప్రశ్నకు స్పందిస్తూ....'కృష్ణ, మహేష్‌బాబుతో కలసి నటించే అవకాశం వస్తే నా అంత అదృష్టవంతులు ఎవరూ లేరని, ఓ మంచి కథ దొరికితే తప్పక చేస్తానని, అసలు మహేష్‌బాబుతో నటించే అర్హత ఉండాలని, ప్రస్తుతం నాకు అది లేదనే అనుకుంటున్నాను అన్నారు.

మహేష్‌బాబు ఎంతో కష్టపడి స్టార్‌డమ్ సాధించిన హీరో అని, తను హీరోగా పరిచయమైన సమయంలో కృష్ణగారు సినిమాలు చేయడంలేదని తెలిపారు. ఏ చిత్రానికైనా కృష్ణ జడ్జిమెంట్ వందశాతం ఖచ్చితంగా ఉంటుందని, తన భార్య కూడా చిన్నప్పటినుండి సినిమా వాతావరణం చూసిన వ్యక్తి కనుక పూర్తి కాన్ఫిడెన్స్‌తో ఆమె చెప్పిన విషయాలు నచ్చుతాయని, తాను కచ్చితంగా ఏ చిత్రం ఎలా ఉంటుందో అంచనా వేయగలదని తెలిపారు.

నేను మహేష్ బాబు స్ట్రాటజీని గుడ్డిగా ఫాలో అవుతాను. మహేష్ బాబు కెరీర్ మొదట్లో ఆయన కొన్ని తరహా కథలని, పాత్రలని మాత్రమే ఎంచుకునే వారు. ఎప్పుడైతే ఆయన అలా చేయడం మానేశారో అప్పుడే ఆయనకు అసలైన సక్సెస్ వచ్చింది. ఇప్పుడు ఆయన ప్రతి కథ వింటున్నారు, వాటిల్లో నుంచి బెస్ట్ కథల్ని ఎంచుకుంటున్నారు. నేను కూడా ఇంచు మించు ఆయనలానే చేస్తున్నాను. సూపర్‌స్టార్ కృష్ణ, మహేష్‌బాబు అభిమానులకు కావలసిన అన్ని ఎలిమెంట్స్ ఈ చిత్రంలో ఉంటాయని, ద్వితీయ చిత్రంగా తాను నటించిన ఈ చిత్రం విజయవంతవౌతుందన్న నమ్మకాన్ని ఆయన వ్యక్తంచేశారు.