ఇక ప్రయోగాలు వద్దనుకుంటున్న నితిన్.. వెంకీ కుడుముల చిత్రంలో!

| Published: Saturday, September 8, 2018, 10:53 [IST]

యంగ్ హీరో నితిన్ దాదాపు పదేళ్ల పాటు హిట్ లేని టైం లో ఇష్క్ చిత్రంతో గోడకు కొట్టిన బంతిలా విజయాలు సాధించాడు. మరోమారు నితిన్ ని వరుస ఫెయిల్యూర్స్ సమస్యగా మారింది. త్రివిక్రమ్ శ్రీనివాస్ దర్శత్వంలో వచ్చిన అ ఆ చిత్రం తరువాత నితిన్ హిట్ అందుకోలేదు. యాక్షన్ నేపథ్యంలో తెరకెక్కించిన లై, ఫ్యామిలీ ఆడియన్స్ టార్గెట్ గా వచ్చిన శ్రీనివాస కళ్యాణం చిత్రాలు నిరాశపరిచాయి. మధ్యలో రొమాంటిక్ లవ్ స్టోరీగా వచ్చిన ఛల్ మోహన్ రంగ చిత్రం కూడా సరైన ఫలితాన్ని ఇవ్వలేదు.

దీనితో తదుపరి సినిమా విషయంలో పక్కాగా వ్యవహరించాలని నితిన్ భావిస్తున్నాడు. ఛలో చిత్రంతో తొలి ప్రయత్నంలోనే విజయం సాధించిన వెంకీ కుడుముల దర్శత్వంలో నితిన్ నటించబోతున్న సంగతి తెలిసిందే. ఇక ప్రయోగాల జోలికి పోకుండా ఆడియన్స్ ని ఎంటర్ టైన్ చేసి విజయం సాధించాలని నితిన్ భావిస్తున్నాడట.

తదుపరి చిత్రంలో ఎంటర్ టైన్ మెంట్ పాళ్లు ఎక్కువగా ఉండేలా దర్శకుడికి సూచించినట్లు తెలుస్తోంది. ఈ సినిమాకు సంబంధించి స్క్రిప్ట్ పనులు పూర్తయినట్లు తెలుస్తోంది. నటీనటుల ఎంపిక కాగానే సినిమా సెట్స్ పైకి వెళ్లే అవకాశాలు కనిపిస్తున్నాయి.