మోక్షజ్ఞ బర్త్ డే సెలబ్రేషన్స్: కొడుకు ఎంట్రీపై బాలయ్య ప్రకటన

ఉత్సాహంగా కనిపించిన బాలయ్య

మోక్షజ్ఞ జన్మదిన వేడుకల్లో బాలయ్య చాలా ఉత్సాహం కనిపించారు. అభిమానులతో కలసి పుట్టిన రోజు వేడుకల్లో పాల్గొన్న ఆయన స్వయంగా కేక్ కట్ చేసి వేడుకలు నిర్వహించారు. నందమూరి అభిమానులు మోక్షజ్ఞ లాంచింగ్ కోసం ఎంతో ఆసక్తిగా ఎదురు చూస్తున్నారని, వారందరి కోరికా త్వరలోనే నెరవేరుతుందని చెప్పారు.

ఎంతో దూరం లేదు

తాను ఎక్కడికి వెళ్లినా మోక్షజ్ఞ సినిమా ఎప్పుడన్న ప్రశ్న ఎదురవుతుందని.... ఆ రోజు ఎంతో దూరంలో లేదని, వచ్చే సంవత్సరం జూన్ కెల్లా ఓ మంచి బ్యానరులో తొలి చిత్రం ప్రారంభమవుతుందని బాలయ్య తెలిపారు.

101 చీరల పంపిణీ

ఈ పుట్టినరోజు వేడుకలో చీరల పంపిణీ కూడా జరిగింది. తన 101వ చిత్రం 'పైసా వసూల్' విజయవంతమైన సందర్భాన్ని పురస్కరించుకుని 101 మంది మహిళలకు చీరలను పంపిణీ చేశారు.

మీ ఆశీస్సులు కావాలి

ఆడపడుచులకు చీరలు పంచడం తనకెంతో ఆనందాన్ని కలిగించిందని, తన కుమారుడు దీర్ఘాయువుతో వర్థిల్లాలని, మీ ఆశీస్సులతో పాటు నందమూరి అభిమానులు మోక్షజ్ఞ వెంట ఎప్పుడూ ఉండాలని కోరుకుంటున్నట్లు బాలయ్య తెలిపారు.