పవన్ కళ్యాణ్, మహేష్ బాబు కిస్

హైదరాబాద్ : అడవి శేషు స్వీయ దర్శకత్వంలో నటిస్తూ నిర్మించిన చిత్రం 'కిస్'. 'కిస్' అంటే 'కీపిట్ సింపుల్ స్టుపిడ్' ఇదే ఈ సినిమా ట్యాగ్ లైన్. అడవి సాయికిరణ్ మైడ్రీమ్స్ సినిమా ప్రైవేట్ లిమిటెడ్, థౌజండ్ లైట్స్ సినిమా చిత్రం పతాకంపై ఈ చిత్రాన్ని రూపొందించారు. ఇటీవల ఈ చిత్రానికి సంబంధించిన టీజర్‌ కూడా విడుదలైంది.

ఈ చిత్రంలో పవర్ స్టార్ పవన్ కళ్యాణ్, సూపర్ స్టార్ మహేష్ బాబు కూడా కనిపించబోతున్నారట. వీరిద్దరు కలిసి ఒకే చిత్రంలో కనిపించడం ఏమిటని ఆశ్చర్య పోతున్నారా?. ఇందులో ఆశ్యర్య పోవడానికి ఏమీ లేదండీ. దర్శకుడు, హీరో అడవి శేషు ఈ ఇద్దరు స్టార్ల అభిమానులను తన సినిమా వైపు ఆకర్షించడానికి....పంజా, దూకుడు చిత్రాల్లోని సీన్లు ఈ చిత్రంలో పెట్టాడట.

ఆవిధంగా ఈ స్టార్స్ ఇద్దరు 'కిస్' సినిమాలో కనిపించబోతున్నారన్నమాట. గతంలో అడవి శేషు 'పంజా' చిత్రంలో నటించిన సంగతి తెలిసిందే. కిస్ ఆడియోని ఈ నెల 14న విడుదల చేయాలనుకున్నారు. కానీ బ్యాక్ గ్రౌండ్ మ్యూజిక్ కూడా ఆడియో‌లో పెట్టాలని అనుకోవడం వల్ల వాయిదా వేయడం జరిగింది. ఈ సినిమా ఆడియోని జూన్ 22 తేదిన లేదా 23 తేదిన విడుదల చేయడానికి ప్లాన్ చేస్తున్నారు.

ఇక ఈ సినిమా గురించి అడవి శేషు మాట్లాడుతూ- సంగీత దర్శకుడు శ్రీచరణ్ పాకాల అందించిన ట్రాక్స్ అద్భుతంగా కుదిరాయని, ముఖ్యంగా రీ రికార్డింగ్ అందరికీ నచ్చుతుందని తెలిపారు. సినిమాలో పాటలు అందరికీ నచ్చుతాయని తాను ఆశిస్తున్నట్లుగా శ్రీచరణ్ పాకాల తెలిపారు. క్వాలిటీ వీడియోగా ఆర్.ఆర్.ట్రాక్స్‌తో కలిసి ఈ పాటలను ప్రేక్షకులకు అందిస్తున్నామని నిర్మాత సాయికిరణ్ అడవి తెలిపారు.