పవన్ కళ్యాణ్ నిర్మాతగా... రామ్ చరణ్ సినిమా!

హైదరాబాద్: మెగా కుటుంబంలో విబేధాలు ఉన్నాయంటూ... చిరంజీవి, రామ్ చరణ్‌లతో పవన్ కళ్యాణ్‌కు పడటం లేదంటూ చాలా కాలంగా వార్తలు ప్రచారంలో ఉన్నాయి. అలాంటివేమీ లేదని మెగాహీరోలంతా గతంలో పలు సందర్భాల్లో స్పష్టం చేసారు. అయినా ఆ వార్తలకు తెర పడలేదు. అయితే ఇవన్నీ కేవలం పుక్కిటి పుకార్లే అని మరోసారి తేటతెల్లం అయంది.

మెగా పవర్ స్టార్ రామ్ చరణ్ త్వరలో పవన్ కళ్యాణ్‌తో కలిసి పని చేయబోతున్నారు. అయితే ఈ ఇద్దరూ ఏదో కలిసి నటిస్తారు.... రామ్ చరణ్ సినిమాలో పవన్ కళ్యాణో, లేక పవన్ కళ్యాణ్ సినిమాలో రామ్ చరణో గెస్ట్ రోల్స్ చేస్తారేమో అనుకుంటే పొరపాటే. రామ్ చరణ్ హీరోగా తెరకెక్కబోయే ఈ సినిమాను స్వయంగా పవన్ కల్యాణ్ నిర్మించబోతున్నారు.

2016 ప్రథమార్థంలో పవన్ కళ్యాణ్-రామ్ చరణ్ సినిమా ప్రారంభం కాబోతోంది. ఈ రోజు జరిగిన ఓ వాణిజ్య కార్యక్రమంలో రామ్ చరణ్ ప్రత్యేకంగా ఈ విషయాన్ని ప్రస్తావించడాన్ని బట్టి ఈ సినిమాకు సంబందించి ఇప్పటికే తెర వెనక కసరత్తు జరుగుతున్నట్లు తెలుస్తోంది.

అయితే ఈ సినిమాకు కథ ఎవరు అందిస్తున్నారు? దర్శకత్వం వహించేది ఎవరు? హీరోయిన్ గా ఎవరు నటిస్తున్నారు? లాంటి విషయాలేవీ బయటకు రాలేదు. చిరంజీవి 150వ సినిమా ప్రారంభం అయిన తర్వాత ఈ సినిమాకు సంబంధించిన పూర్తి వివరాలు బయటకు వచ్చే అకవాశం ఉంది. రామ్ చరణ్ ప్రకటనతో మెగా అభిమానులు ఫుల్ హ్యాపీగా ఉన్నారు.