‘రేడియో మిర్చి’ మ్యూజిక్ అవార్డ్స్

By Bojja Kumar

Published: Friday, August 24, 2012, 15:35 [IST]

హైదరాబాద్: సంగీత కళాకారుల్ని రేడియో మిర్చి సమున్నతంగా సత్కరించింది. ఇటీవల హైదరాబాద్‌లో జరిగిన మిర్చి మ్యూజిక్ అవార్డ్స్ సౌత్ -2011 వేడుక అంగరంగ వైభవంగా జరిగింది. దక్షిణాది చలనచిత్ర అగ్రతారలు ఈ వేడుకకు విచ్చేసి ఆహుతుల్ని అలరించారు. దక్షిణాదికి చెందిన నాలుగు భాషల కళాకారులు ఈకార్యక్రమంలో అవార్డుల్ని స్వీకరించారు. తెలుగు సంగీత దర్శకుడు కోటి జీవిత సాఫల్య పురస్కారాన్ని అందుకున్నారు. ఈ సందర్భంగా ఆయన మాట్లాడుతూ... ప్రేక్షకుల అభిమానం, పరిశ్రమ ప్రోత్సాహంతో నేనీ స్థాయికి చేరుకున్నాను. ఇంకా సాధించాల్సింది చాలా ఉంది. నా సినీ ప్రయాణంలో రాజ్ నాతో పాటు చాలా సినిమాలకు పని చేసాడు. ఈ అవార్డు ఆయనకు కూడా చెందుతుంది. ప్రతిష్టాత్మక ఈ అవార్డును స్వీకరించడం ఆనందంగా ఉంది' అన్నారు.

నాగార్జున మాట్లాడుతూ ' సినిమాల్లోకి రాకముందు నుంచే కోటి పాటల్ని వింటుండే వాడిని. ఆయన పాటలంటే నాకు చాలా ఇష్టం. నేను చేసిన 'హలో బ్రదర్' సినిమాకు కోటి అద్భుతమైన సంగీతాన్నందించాడు. అందులో 'ప్రియ రాగాలే..' పాటంటే నాకు చాలా ఇష్టం' అన్నారు.

ఈ అవార్డ్స్ లో 'శ్రీరామరాజ్యం' చిత్రం అత్యధికంగా ఏడు అవార్డులు సొంతం చేసుకుంది. ఉత్తమ నేపథ్య గాయకుడిగా ఎస్ పి బాలసుబ్రహ్మణ్యం, నేపథ్య గాయనిగా శ్రేయ ఘెషల్, గేయ రచయితగా జొన్న విత్తుల, అత్యధిక ప్రజాదరణ పొందిన పాటగా 'జగదానంద తారక' అవార్డులను పొందాయి. ఉత్తమ కమర్షియల్ ఆల్బమ్ అవార్డును 'దూకుడు' చిత్రానికిగాను తమన్ అందుకున్నారు. ఈ వేడుకలో గాయనీగాయకులు ఆలపించిన పాటలు శ్రోతల్ని అలరించాయి. ఉషా ఉతుప్ పాడిన 'కొలవెరి 'పాట శ్రోతల్ని ఉర్రూతలూగించింది. ఈ కార్యక్రమంలో రాఘవేంద్రరావు, అల్లు అరవింద్, డి. సురేష్ బాబు, కోదండరామిరెడ్డి, వెంకటేష్, మణి శర్మ, ఎస్.కె. రాజ్ కుమార్, రమణ గోగుల, ధనుష్, అనిరుధ్, జీవీ ప్రకాష్ కుమార్, కుష్భూ, మంచు లక్ష్మీ, కామ్నా జఠ్మలానీ, కృతి కర్భందా తదితరులు పాల్గొన్నారు.

More from Filmibeat