రాఘవేంద్రరావు లక్కీ మేన్ అంటున్న నాగార్జున (ఫోటోస్)

By Bojja Kumar

Updated: Wednesday, May 6, 2015, 19:25 [IST]

హైదరాబాద్: ప్రముఖ టాలీవుడ్ దర్శకుడు రాఘవేంద్రరావు తిరుమలి తిరుపతి దేవస్థానం ట్రస్టు బోర్డు సభ్యుడిగా నియమితులైన సంగతి తెలిసిందే. బుధవారం ఈ పదవికి సంబంధించి ప్రమాణ స్వీకారోత్సవ కార్యక్రమం జరిగింది. బుధవారం ఉదయం 9.30 గంటలకు శ్రీవారి సన్నిధిలో ఈ ప్రమాణ స్వీకారోత్సవం జరిగింది. ఈ కార్యక్రమంలో ప్రముఖ తెలుగు నటుడు నాగార్జున, సంగీత దర్శకుడు కీరవాణి కూడా పాల్గొన్నారు.

ప్రమాణ స్వీకారోత్సవం అనంతరం రాఘవేంద్రరావు శ్రీవారిని దర్శించుకున్నారు. అనంతరం రంగనాయకుల మండపంలో వేదసిర్వచనం నిర్వహించారు. ఈ సందర్భంగా తిరుమల తిరుపతి దేవస్థానం చైర్మన్ డా. సిహెచ్.కృష్ణ మూర్తి, టీటీడీ ఈఓ డా. డి సాంబశివరావు దర్శకేంద్రుడికి శ్రీవారి లడ్డూ ప్రసాదం, శ్రీవారి ల్యామినేషన్ ఫోటో బహూకరించారు.

అనంతరం రాఘవేంద్రరావు మాట్లాడుతూ....తనకు ఈ పదవి దక్కడంపై ఆనందం వ్యక్తం చేసారు. శ్రీవారికి, శ్రీవారి దర్శనానికి వచ్చే యాత్రికులకు సేవ చేసే భాగ్యం లభించడం సంతోషంగా ఉందన్నారు.

మీడియా వారు అడిగిన ఓ ప్రశ్నకు నాగార్జున స్పందిస్తూ ఆ వేంకటేశ్వర స్వామి టీటీడీ ధర్మకర్తల మండలిలో చోటు కల్పిస్తానంటే ఎందుకు కాదంటాను, తప్పకుండా స్వీకరిస్తా అన్నారు. శ్రీవేంకటేశ్వర స్వామివారిపై అపారమైన భక్తి విశ్వాసాలు కలిగిన రాఘవేంద్రరావుకు టీటీడీ ధర్మకర్తల మండలిలో మరోసారి అవకాశం రావటం అదృష్టమన్నారు. నాగార్జునను చూడటానికి అభిమానులు ఎగబడ్డారు. ఓ మహిళ ఆయన చేయి పట్టుకుని ముద్దాడింది.

స్లైడ్ షోలో ప్రమాణ స్వీకారోత్సవానికి సంబంధించిన ఫోటోలు.