అరెరే...ఆస్కార్‌ బరి నుంచి మన దేశ చిత్రం ఔట్‌

By Srikanya

| Published: Sunday, December 22, 2013, 11:09 [IST]

ముంబయి:ఆశలు రేపిన గుజరాతీ చిత్రం 'ది గుడ్‌ రోడ్‌' ఆస్కార్‌ బరిలో నిలవలేకపోయింది. తాజాగా ప్రకటించిన జాబితాలో ఆ చిత్రానికి చోటు లభించలేదు. ఉత్తమ విదేశీ చిత్రం అవార్డు కోసం ప్రపంచ వ్యాప్తంగా 76 సినిమాలు పోటీపడ్డాయి. వాటిలో తొమ్మిది చిత్రాలను తాజా రౌండ్‌కి ఎంపిక చేశారు. ఇటీవల ప్రకటించిన ఆ జాబితాలో 'ది గుడ్‌ రోడ్‌'కి స్థానం లభించలేదు. ఈ చిత్రాన్ని ఎంపిక చేయడంపై అప్పట్లో పలు విమర్శలొచ్చాయి. కరణ్‌జోహార్‌, అనురాగ్‌ కశ్యప్‌ లాంటి దర్శకులు బాహాటంగానే విమర్శలు గుప్పించారు. 'ది లంచ్‌ బాక్స్‌', 'షిప్‌ఆఫ్‌ థీసిస్‌', 'భాగ్‌ మిల్కా భాగ్‌' లాంటి చిత్రాల్ని కాదని... 'ది గుడ్‌ రోడ్‌'ని ఎంపిక చేయడం అన్యాయమని పలువురు ఆరోపించారు.

వాస్తవానికి ...ఉత్తమ విదేశీ చిత్రం విభాగంలో భారత్ నుంచి పలు చిత్రాలు 'ఆస్కార్' నామినేషన్ ఎంట్రీకి పోటీ పడగా.....అన్నింటికీ వెనక్కి నెట్టుతూ గుజరాతీ చిత్రం 'ది గుడ్ రోడ్' ఆ అవకాశం దక్కించుకుంది. పోటీలో మొత్తం 22 చిత్రాలు నిలవగా 'ది గుడ్ రోడ్' చిత్రం ఎంపికయింది. ఫిల్మ్ ఫెడరేషన్ ఆఫ్ ఇండియా అధ్యక్షుడు గౌతమ్ ఘోష్, ఇతర జ్యూరీ సబ్యులు దాదాపు 5 గంటల సుధీర్ఘ చర్చల అనంతరం ఈ చిత్రాన్ని ఏకగ్రీవంగా ఎంపిక చేసారు. ఈ చిత్రం ఇప్పటికే ఉత్తమ చిత్రంగా జాతీయ అవార్డు దక్కించుకుంది. కేవల్ కట్రోడియా, సోనాలి కులకర్ణి, అజయ్ గేహి ముఖ్య పాత్రలు పోషించిన ఈచిత్రానికి గ్యాన్ కొర్రెయా అనే నూతన దర్శకుడు దర్శకత్వం వహించారు.

ఇక, నామినేషన్ దక్కించుకున్న ఇతర దేశాల చిత్రాల విషయానికి వస్తే... 'ది బ్రోకెన్ సర్కిల్ బ్రేక్‌డౌన్ (బెల్జియమ్), 'యాన్ ఎపిసోడ్ ఇన్ ది లైఫ్ ఆఫ్ యాన్ ఐరన్ పికర్' (బోస్నియా మరియు హెర్‌జెగోవినా), 'ది మిస్సింగ్ పిక్చర్' (కంబోడియా), 'ది హంట్' (డెన్‌మార్క్), 'టూ లైవ్స్' (జర్మనీ), 'ది గ్రాండ్‌మాస్టర్' (హంగ్‌కాంగ్), 'ది నోట్‌బుక్' (హంగేరి), 'ది గ్రేట్ బ్యూటీ' (ఇటలీ), 'ఒమర్' (పలెస్టైన్) ఉన్నాయి. ఇల్లు అలకగానే పండగ కాదు అన్నట్లు.. నామినేషన్ దక్కించుకున్నంత మాత్రాన ఫైనల్స్‌కి వెళతాయనడానికి లేదు. వీటిలో ఓ ఐదు చిత్రాలను ఎంపిక చేసి, ఫైనల్స్‌కి పంపిస్తారు. వచ్చే నెల 16న నామినేషన్ దక్కించుకున్న ఆ ఐదు చిత్రాల వివరాలను ఆస్కార్ కమిటీ ప్రకటిస్తుంది. ఆ ఐదులో ఒక చిత్రాన్ని ఆస్కార్ వరిస్తుంది.

ఆస్కార్ నామినేషన్ రేసులో బాలీవుడ్ నుంచి ది లంచ్ బాక్స్, భాగ్ మిల్కా భాగ్, ఇంగ్లిష్ వింగ్లిష్, కమల్ హాసన్ నటించిన విశ్వరూపం, తెలుగు నుంచి మిధునం, చదువుకోవాలి, మళయాల చిత్రం సెల్యూలాయిడ్ లాంటి చిత్రాలు పోటీ పడ్డాయి. అయితే వీటన్నింటికంటే 'ది గుడ్ రోడ్' చిత్రాన్ని బెస్ట్ చిత్రంగా ఆస్కాన్ నామినేషన్ ఎంట్రీకి ఎంపిక చేసారు. కానీ ఇప్పుడు అది కూడా బయిటకు వచ్చేసింది.

Comments

English summary

The Academy of Motion Picture Arts & Sciences has announced a list of nine films that will advance to the next round of voting in the Foreign Language Film category and Indian director Gyan Correa's film "The Good Road", is out of the race. The Gujarati film was chosen to represent the country in the category at the coveted awards event this year. Out of the nine, five will be shortlisted for the finale. The 86th Academy Awards nominations will be announced Jan 16, 2014, according to the statement on the official Oscar website.

Story first published: Sunday, December 22, 2013, 11:09 [IST]

Other articles published on Dec 22, 2013