దీపావళి బరి నుంచి తప్పుకుని దారి ఇస్తున్నారు

విక్రమ్ ...ఐ

ఇతర హీరోల పరిస్థితి ఏమోకానీ.. 'అపరిచితుడు' తర్వాత సరైన హిట్‌ లేక విలవిలలాడిపోతున్నారు విక్రం. 'తాండవం' తర్వాత ఏకంగా రెండున్నరేళ్లపాటు శంకర్‌ దర్శకత్వంలోని 'ఐ'లో నటించారు. అన్ని పనులూ పూర్తయినా.. ఇంకా విడుదలకు నోచుకోకపోవడంతో విక్రం తీవ్ర ఆవేదనకు గురయ్యారు. ఈ దీపావళికి తన పేరు మోతమోగుతుందని భావించారు. కానీ ఆ సినిమా పండుగ బరిలో నుంచి తప్పుకుంది. డిసెంబరులోగానీ.. సంక్రాంతికిగానీ విడుదలయ్యే సూచనలు కనిపిస్తున్నాయి.

కత్తి

గత ఏడాది మాదిరిగానే 'తుపాకి' వంటి హిట్‌ను సొంతం చేసుకోవాలని భావించిన ఏఆర్‌ మురుగదాస్‌, విజయ్‌లు.. ఈ సారి 'కత్తి'తో సిద్ధమయ్యారు. ఈ సినిమాకు చిత్రీకరణ దశ నుంచి ఇప్పటి వరకు సమస్యలు ఎదరవుతూనే ఉన్నాయి. 'కత్తి' సినిమా విడుదలను అడ్డుకుంటామని వీసీకే అధ్యక్షుడు తిరుమావళవన్‌ ఇప్పటికే ప్రకటించారు. ఇంకా పలు తమిల సంఘాలు కూడా గుర్రుగా ఉన్నాయి. ఓ తమిళ చిత్రాన్ని శ్రీలంకకు చెందిన వ్యక్తి.. అందులోనూ రాజపక్స బంధువు నిర్మించడమేంటని నిలదీస్తున్నారు. మరి ఈ పరిస్థితులను దాటుకుని దీపావళికి చిత్రం వస్తుందో?.. రాదో?.. కూడా తెలియని పరిస్థితి నెలకొంది.

మరో విజయం కోసం

వరుస పరాజయాలతో సతమతమైన విశాల్‌కు 'పాండియనాడు' మంచి బ్రేక్‌నిచ్చింది. తాజాగా వచ్చిన 'నాన్‌ సిగప్పు మనిదన్‌' కూడా హిట్టయింది. ఈ నేపథ్యంలో హ్యాట్రిక్‌ కొట్టేందుకు 'పూజై'తో సిద్ధమవుతున్నారు విశాల్‌. తెలుగు, తమిళంలో ఒకేసారి ఈ చిత్రాన్ని తీసుకొస్తున్నారు. హరి దర్శకత్వం వహించగా... శ్రుతిహాసన్‌ కథానాయిక. ఈ చిత్రం ప్రేక్షకులకు దీపావళి ధమాకాను ఏ రేంజ్‌లో అందిస్తుందో వేచిచూడాలి.

మరోవైపు

ఎల్టీటీఈ అధినేత ప్రభాకరన్‌ కుమారుడు చిన్నారి బాలచంద్రన్‌ జీవితకథ నేపథ్యంలో తెరకెక్కుతున్న 'పులిపార్వై' కూడా దీపావళికే విడుదల కానుండటం విశేషం.

తెలుగులోనూ...

తెలుగులోనూ విశాల్ నటించిన పూజ చిత్రం విడుదల అవుతోంది. మిగతా చిత్రాలు కూడా డబ్ చేసారు విడుదల కోసం...అయితే అవన్నీ ప్రక్కకు తప్పుకోవటం ఇక్కడ కూడా కలిసి వచ్చే అంశం.