‘బిగ్ బాస్ తెలుగు సీజన్ 2’ హడావుడి మొదలైంది, సామాన్యులకూ ఛాన్స్!

పూర్తిగా కొత్త లుక్‌తో బిగ్ బాస్ సీజన్ 2

బిగ్ బాస్ తెలుగు సీజన్ 2 మొదటి దానికంటే పూర్తిగా భిన్నమైన లుక్‌తో ప్రేక్షకులకు సరికొత్త అనుభూతి కలిగించనుంది. షోకు సంబంధించి టైటిల్‌లోగో, బిగ్ బాస్ హౌస్ ప్రతి అంశంలో పూర్తిగా మార్పులు చేశారు.

సామాన్యులకు ఈ సారి షోలో అవకాశం

బిగ్ బాస్‌ 2లో కేవలం సెలబ్రిటీలకు మాత్రమే కాదు, సామాన్య ప్రజలకు కూడా అవకాశం కల్పించాలని నిర్వాహకులు డిసైడ్ అయ్యారు. సామాన్య ప్రజలు మే 15 వరకు తమ ఎంట్రీలు పంపించవచ్చు. మీ అదృష్టం బావుంటే మీరూ బిగ్ బాస్ హౌస్‌లోకి వెళ్లే అవకాశం దక్కించుకోవచ్చు. ఇందుకోసం biggbosstelugu.startv.com వెబ్ సైట్లో రిజిస్టర్ అవ్వాల్సి ఉంటుంది.

ఈ సారి ఎన్టీఆర్ స్థానంలో ఎవరు?

బిగ్ బాస్ తెలుగు మొదటి సీజన్‌ను హోస్ట్ చేసిన యంగ్ టైగర్ ఎన్టీఆర్ సినిమాల బిజీ వల్ల తప్పుకున్నారు. దీంతో నిర్వాహకులు హీరో నానిని సంప్రదించారని, నాని ఈ షో హోస్ట్ చేయడానికి ఓకే చెప్పారని సమాచారం. అయితే అఫీషియల్‌గా ప్రకటన రావాల్సి ఉంది.

శ్రీరెడ్డి, మాధవి లత పేర్లు తెరపైకి

ఫిల్మ్ నగర్ వర్గాల నుండి అందుతున్న సమాచారం ప్రకారం ఈ మధ్య కాలంలో వివాదాలతో మీడియాలో హాట్ టాపిక్ అయిన మాధవి లత, శ్రీరెడ్డి తదితరులకు బిగ్ బాస్ నిర్వాహకులు ఆహ్వానం పంపినట్లు తెలుస్తోంది. వీరితో పాటు కొందరు టీవీ యాంకర్లు, నటులకు ఆహ్వానాలు అందాయట. ఫైనల్‌గా ఎవరు బిగ్ బాస్ 2 ఇంట్లోకి ఎంటర్ అవుతారో చూడాలి. వీరితో పాటు ఈ సారి సమాన్య ప్రజలకు ఇందులో అవకాశం ఇవ్వబోతున్నారు.