‘జాన్’లో ప్రభాస్ రోల్ లీక్.. యంగ్ రెబెల్ స్టార్ వాటన్నింటినీ మాయం చేసేస్తాడట

అనుకున్నదొకటి.. అయింది మరొకటి

యంగ్ రెబెల్ స్టార్ ప్రభాస్ ఇటీవల ‘సాహో' అనే సినిమా చేశాడు. దాదాపు రూ. 350 కోట్లతో తెరకెక్కిన ఈ సినిమా ఊహించిన ఫలితాన్ని మాత్రం రాబట్టలేకపోయింది. దీంతో అతడి ఫ్యాన్స్‌కు నిరాశ.. నిర్మాతలకు నష్టాలు మిగిలాయి. ఇందులో ప్రభాస్ సరసన శ్రద్దా కపూర్ నటించింది. యూవీ క్రియేషన్స్ సంస్థ ఈ చిత్రాన్ని నిర్మించింది.

సరికొత్త ప్రయోగం చేయబోతున్నాడు

పూర్తి యాక్షన్ ఎంటర్‌టైనర్‌గా తెరకెక్కిన ‘సాహో' తర్వాత ప్రభాస్ నటిస్తున్న చిత్రం ‘జాన్'. 1960వ దశకం నాటి కథతో వస్తున్న ఈ మూవీని ‘జిల్' ఫేం రాధాకృష్ణ తెరకెక్కిస్తున్నాడు. పిరియాడిక్ రొమాంటిక్ ఎంటర్టైనర్‌గా రూపొందుతున్న ఈ సినిమాలో పూజా హెగ్డే హీరోయిన్. ఇందులో ప్రభాస్‌ను లవర్ బాయ్‌గా చూపించబోతున్నారు.

ప్రభాస్ గ్యాప్ ఎందుకు ఇచ్చాడు?

వాస్తవానికి ‘సాహో'కు ముందే ఈ సినిమా షూటింగ్ ప్రారంభం అయింది. యూరప్‌లో కొన్ని సన్నివేశాలు సైతం చిత్రీకరించారు. కానీ, వాటిని అలా వదిలేసి సరికొత్తగా స్టార్ట్ చేశారు. ఈ షూటింగ్ మొదటి షెడ్యూల్ ఇటీవలే ముగిసింది. దీంతో ప్రభాస్ విరామం తీసుకున్నాడు. ప్రస్తుతం అతడు ఫారెన్ టూర్‌లో బిజీగా ఉన్నాడు. అతడు గ్యాప్ ఎందుకు తీసుకున్నాడని చర్చ జరుగుతోంది.

ఒకటి కాదు.. ఎన్నో వైరల్ అయ్యాయి

పూర్తి లవ్ స్టోరీగా వస్తున్న ఈ సినిమా గురించి కొద్ది రోజులుగా ఎన్నో వార్తలు వైరల్ అవుతున్నాయి. ఇందులో నటించే ఆర్టిస్టుల గురించి మాత్రమే కాకుండా.. ఈ సినిమా స్టోరీ లీక్ అయిందని కూడా ప్రచారం జరిగింది. అలాగే, ఇందులో ప్రభాస్ డ్యుయల్ రోల్ చేస్తున్నాడని కూడా టాక్ ఉంది. దీంతో ఈ చిత్రం తరచూ వార్తల్లో నిలుస్తోంది.

‘జాన్'లో ప్రభాస్ రోల్ లీక్

తాజాగా ఈ సినిమాలో ప్రభాస్ రోల్ గురించి ఓ ఇంట్రెస్టింగ్ న్యూస్ బయటకు వచ్చింది. ఇందులో ఈ స్టార్ హీరో దొంగగా కనిపించబోతున్నాడనేదే ఆ వార్త సారాంశం. ఇందులో అతడు పాత కాలపు కార్లు, బైకులు దొంగతనం చేస్తుంటాడని అంటున్నారు. ఈ క్రమంలోనే హీరోయిన్ ప్రేమలో పడడం.. ఆమె కోసం దొంగతనాలు మానేయడం చేస్తాడనే టాక్ వినిపిస్తోంది.