వైఎస్‌ జగన్‌తో అలా ఎంజాయ్.. ఈ ఐదేళ్లే కాదు.. మరెన్నో ఏళ్లు అధికారంలో.. సూర్య

జగనన్న అని పిలుస్తాను

వైఎస్ జగన్మోహన్‌రెడ్డితోపాటు వారి కుటుంబంతో నాకు మంచి అనుబంధం ఉంది. నేను జగనన్న అని పిలుస్తాను. వైఎస్ జగన్ కజిన్స్ అనిల్ రెడ్డి నాకు క్లాస్ మెట్స్. మరో కజిన్ సునీల్ నాకు మంచి ఫ్రెండ్. మేమిద్దరం కలిసి చదువుకొన్నాం. జగన్ అలా నాకు పరిచయం. మేమిద్దరం చెన్నైలో కలుసుకొనే వాళ్లం. ఆ సమయంలో ఎక్కువగా ఐస్ క్రీం పార్లర్లకు వెళ్లే వాళ్లం. జగన్‌కు ఐస్ క్రీమ్ అంటే ఎక్కువగా ఇష్టం. మేము ఎంజాయ్ చేయడానికి అదో కారణం అని హీరో సూర్య అన్నారు.

జగన్‌ను ఎక్కువగా కలుసుకోలేకపోయాను

నా ప్రొఫెషన్ వేరే అయినందున వైఎస్ జగన్‌ను ఎక్కువగా కలుసుకోలేకపోయాను. కానీ అనిల్ రెడ్డిని ప్రతీ విషయాన్ని అడిగి తెలుసుకొన్నాను. పదేళ్ల క్రితం వారి కుటుంబానికి జరిగిన అన్యాయంతో నాతోపాటు అందరూ తీవ్ర దిగ్బ్రాంతికి లోనయ్యారు. వైఎస్ జగన్ జీవితంలో చాలా సంఘటనలు చోటుచేసుకొన్నాయి. వాటన్నింటిని తట్టుకొని తాను అనుకొన్నది సాధించాడు అని సూర్య పేర్కొన్నారు.

వైఎస్ జగన్ పట్టుదల.. కృషి గొప్పది

గత పదేళ్లలో ఎన్నో కార్యక్రమాలతో ప్రజలకు దగ్గరయ్యారు. ఎన్నో కిలోమీటర్లు పాదయాత్ర చేశారు. ఆయన పట్టుదల, కృషి, అంకుఠిత దీక్ష చాలా బలమైనది. ఆయన పట్టుదల చూసి ప్రజలు ఆయనకు అధికారం అప్పగించారు. వైఎస్ఆర్ కాంగ్రెస్‌కు లభించిన విజయాన్ని బట్టి జగన్‌పై ఎన్ని ఆశలు పెట్టుకొన్నారో అర్ధమవుతుంది. ప్రజల ఆకాంక్షను జగన్ నెరవేరుస్తారని నేను ఆశిస్తున్నాను అని సూర్య అభిప్రాయపడ్డారు.

ఆయనపై గొప్ప భారం ఉంది

ప్రజలు కోరుకొనే మార్పును వైఎస్ జగన్ సాధిస్తాడు. ఆయనపైన హిమాలయాలంత భారం ఉంది. తప్పకుండా అన్నీ సాధిస్తాడు. రాజకీయాలంటే బిగ్ గేమ్. దానిలో సక్సెస్ అవుతాడు. ఈ ఐదేళ్లే కాదు. మరెన్నో సంవత్సరాలు అధికారంలోకి వస్తాడని ఆశిస్తున్నాను. ఆయన విజన్‌తో ఏపీ ప్రజలకు మేలు చేయాలని అనుకొంటాను అని జగన్‌పై హీరో సూర్య ప్రశంసలతో ముంచెత్తారు.