ముఖ్యమంత్రిగా విజయ్ సేతుపతి: ఎన్నికల ముందు ఆ పార్టీ నేతల మాస్టర్ ప్లాన్

తెరపైకి సిద్దరామయ్య బయోపిక్

రామ్ మనోహర్ లోహియా శిష్యుడిగా రాజకీయ ప్రయాణాన్ని ప్రారంభించి.. ఆ తర్వాత జనతాదళ్ యునైడైట్‌లో నాయకుడిగా మారి.. అనంతరం కాంగ్రెస్ పార్టీలో చేరి ముఖ్యమంత్రి స్థాయికి ఎదిగిన నేత సిద్దరామయ్య. కర్నాటకకు సీఎంగా చేసిన ఆయన జీవిత చరిత్రను బయోపిక్‌ మూవీగా తెరకెక్కించే ప్రయత్నాలు జరుగుతున్నాయి. దీంతో ఇది హాట్ టాపిక్ అవుతోంది.

కాంగ్రెస్ పార్టీ నేతల మాస్టర్ ప్లాన్

సిద్దరామయ్య బయోపిక్‌ను తెరపైకి తెచ్చింది ఏ దర్శకులో, నిర్మాతలో కాదు.. కాంగ్రెస్ పార్టీకి చెందిన ఆయన శిష్యులు అని తెలిసింది. అందులోనూ ఈ మాజీ సీఎం క్యాబినెట్‌లో పని చేసి, వీరవిధేయులుగా పేరు తెచ్చుకున్న శివరాజ్ తంగడాగి, శివకుమార్‌లే సిద్ధరామయ్య బయోపిక్‌ కోసం మాస్టర్ ప్లాన్లు చేస్తున్నారట. ఇప్పటికే కొన్ని పాయింట్లతో కథను కూడా రెడీ చేయించారట.

ఆయనతో చర్చలు.. ఓకే అంటే

కర్నాటక మాజీ ముఖ్యమంత్రి సిద్దరామయ్య బయోపిక్ మూవీకి సంబంధించిన న్యూస్ హాట్ టాపిక్ అవుతోన్నా.. దీనిపై ఇంకా స్పష్టత రాలేదని తెలిసింది. తాజా సమాచారం ప్రకారం.. శివరాజ్ తంగడాగి, శివకుమార్ డిసెంబర్ 2 లేదా 3వ తేదీని సిద్దరామయ్యతో సమావేశం కాబోతున్నారట. అప్పుడు ఆయనకు స్టోరీ లైన్‌ను వినిపిస్తారని, దానికి ఓకే చెబితేనే ఇది పట్టాలెక్కుతోందని టాక్.

సిద్దరామయ్య పాత్రలో విజయ్

మాజీ ముఖ్యమంత్రి సిద్దరామయ్య బయోపిక్ మూవీ ప్రకటన జరగక ముందే.. ఇందులో టైటిల్ రోల్ చేసే హీరో పేరును కూడా శివరాజ్ తంగడాగి, శివకుమార్‌లు ఫైనల్ చేసుకున్నారని తెలిసింది. కోలీవుడ్‌లో విలక్షణ పాత్రలతో మెప్పిస్తోన్న స్టార్ హీరో విజయ్ సేతుపతిని ఈ రోల్‌ కోసం తీసుకోబోతున్నారట. ఇప్పటికే అతడి నుంచి దీనికి గ్రీన్ సిగ్నల్ కూడా వచ్చిందట.

ఎన్నికలే టార్గెట్... రిలీజ్ డేట్

వచ్చే ఏడాదిలో కర్నాటక రాష్ట్ర అసెంబ్లీకి సార్వత్రిక ఎన్నికలు జరగబోతున్నాయి. ఈ నేపథ్యంలో డిసెంబర్ నుంచి మార్చి వరకూ సిద్దరామయ్య బయోపిక్ సినిమా షూటింగ్‌ను జరుపుకుని.. ఎలక్షన్ ముందు దీన్ని విడుదల చేసేలా కొందరు కాంగ్రెస్ నాయకులు ప్రయత్నాలు చేస్తున్నారని తెలిసింది. ఇందుకోసం అంతా పక్కాగా ప్లాన్లు చేసుకున్నారనే టాక్ కూడా వినిపిస్తోంది.

హైకమాండ్ ఒప్పుకుంటుందా?

సిద్దరామయ్య బయోపిక్ మూవీ న్యూస్ దేశ వ్యాప్తంగా హైలైట్ అవుతోన్న తరుణంలో దీనిపై భిన్నాభిప్రాయలు వ్యక్తం అవుతున్నాయి. ఇది చేయడానికి ఈ మాజీ సీఎం ఒప్పుకున్నప్పటికీ.. నేషనల్ కాంగ్రెస్ పార్టీ అధిష్ఠానం గ్రీన్ సిగ్నల్ ఇవ్వదు అని అంటున్నారు. అయితే, ఇప్పుడా పార్టీకి చావో రేవో పరిస్థితి కావడంతో బయోపిక్‌కు ఒప్పుకోవచ్చని కూడా పలువురు చెబుతున్నారు.