దుబాయ్‌లో బాలీవుడ్ ప్రముఖుడి అరెస్ట్.. యువతితో అసభ్యంగా, వేధింపులపై కేసు

మీ టూపై మికా సింగ్

సినీ పరిశ్రమలో మీ టూ ఉద్యమం ఉధృతంగా కొనసాగుతున్న నేపథ్యంలో మికా సింగ్ స్పందించాడు. మీ టూ ఉద్యమానికి తాను చేయూతనిస్తాను అని ఇటీవల ప్రకటించాడు. ఇండస్ట్రీలో బాధలు అనుభవిస్తున్న మహిళలు ధైర్యంగా ముందుకొచ్చి తెలుపడం సంతోషం కలిగిస్తుందని ఇటీవల మికా సింగ్ పేర్కొన్నాడు. అలాంటి వ్యక్తి లైంగిక వేధింపుల కేసులో అరెస్ట్ కావడం ఆశ్చర్యానికి గురిచేస్తున్నది.

బ్రెజిల్ యువతిపై వేధింపులు

దుబాయ్ పోలీసుల కథనం ప్రకారం.. మికా సింగ్‌పై బ్రెజిల్ అమ్మాయి ఫిర్యాదు చేసింది. అసభ్యకరమైన ఫొటోలు తనకు పంపిస్తూ వేధించాడు. మురక్కాబాత్ పోలీస్ స్టేషన్‌లో మహిళ ఫిర్యాదు మేరకు అరెస్ట్ చేశాం అని తెలిపారు.

మా కస్టడిలోనే మికా సింగ్

మికా సింగ్ మా కస్టడిలో ఉన్నాడని దుబాయ్ పోలీసులు ధృవీకరించారు. బాలీవుడ్ ఈవెంట్‌ కోసం దుబాయ్ వచ్చిన గాయకుడు మహిళతో అనుచితంగా ప్రవర్తించాడు అని పోలీసులు పేర్కొన్నారు. మికాను జైలు నుంచి విడిపించడానికి ఆయన స్నేహితులు తీవ్రంగా ప్రయత్నాలు చేపట్టారని ప్రముఖ వార్తా ఏజెన్సీ పేర్కొన్నది.

యూఏఈలో ఈవెంట్ కోసం

ఓ సంగీత కచేరి కోసం వచ్చిన యునైటెడ్ అరబ్ ఎమిరేట్స్‌లో మికా సింగ్ అరెస్టయ్యాడు. ఈవెంట్ ముగిసిన తర్వాత ఈ ఘటన జరిగింది. ఈవెంట్ నేపథ్యంలో తనను లైంగికంగా వేధించాడని ఓ మహిళ ఫిర్యాదు చేయడంతో అదుపులోకి తీసుకొన్నారు. ప్రస్తుతం ఆయనను పోలీసులు ప్రశ్నిస్తున్నారు అని మికాసింగ్ బృందం సభ్యుడు వెల్లడించాడు.

దలేర్ మెహందీ సోదరుడిగా

ప్రముఖ గాయకుడు దలేర్ మెహందీ సోదరుడిగా మికాసింగ్ చిత్ర సీమకు పరిచయం అయ్యాడు. బాలీవుడ్‌లో పలు విజయవంతమైన చిత్రాలకు పాటలు పాడారు. ఆ తర్వాత తెలుగు, తమిళ ఇతర భాషల్లో కూాడా పాటలు పడి ప్రజాదరణ పొందారు.