రాజమౌళి వల్లే.. అవంతిక పాత్రను తొక్కెయ్యడంపై తమన్నా..

క్లైమాక్స్ అంతా నా మీదే..

తమన్నా కూడా క్లైమాక్స్ అంతా తనపైనే ఉంటుంది. రెండో భాగం కోసం మరింతగా శ్రమించాను. కత్తిసాము కూడా నేర్చుకొన్నాను అని ప్రమోషన్‌లో వెల్లడించింది. అయితే బాహుబలి2లో ఆమె పాత్ర చిత్రీకరించిన విధానం, ఆమెకు ఇచ్చిన ప్రాధాన్యం చాలా తక్కువ అని అర్థమైంది. అందుకు కారణం దర్శకుడు రాజమౌళితో గొడవ పడటమేనని వార్తలు విస్త్రృతంగా ప్రచారమవుతున్నాయి. ఈ వార్తలపై తమన్నా స్పందించారు.

రాజమౌళి వల్లే

అవంతిక పాత్ర కుదింపుపై వస్తున్న వార్తల్లో నిజం లేదు. నా పాత్ర, దాని ప్రాధాన్యం ఏంటో నాకు తెలుసు. బాహుబలి లాంటి అద్భుతమైన సినిమాను తీసిన రాజమౌళి సార్ అంటే నాకు ఎనలేని గౌరవం ఉంది. రాజమౌళి తీసిన బాహుబలి2 సినిమా నా జీవితంలో ఎంతో మార్పు తెచ్చింది. యాక్టర్‌గా, సినీ పరిశ్రమలో నాకు మంచి గుర్తింపును బాహుబలి ఇచ్చింది అని తమన్నా మీడియాతో అన్నారు.

ఆ అనుమానానికి కారణం..

నిజానికి బాహుబలి1 చిత్రంలో అవంతిక పాత్రదే అగ్రభాగమైనా ఆ పాత్ర ఛాయలు బాహుబలి2లో అసలే కనిపించవు. క్లైమాక్స్‌లో గుంపులో గోవిందయ్య మాదిరిగా అలా కనిపించి మాయవవుతుంది. యుద్ధ పోరాటాల్లో కూడా అవంతిక పాత్ర ఉన్నదా అనే అనుమానం కలిగిస్తుంది. పాటలు పక్కన పెడితే.. డైలాగులు కూడా మచ్చుకు వినిపించవు. ఆ పరిస్థితి చూసిన వారికెవరైనా కావాలనే ఆ పాత్రను కత్తిరించారనిపిస్తుంది. అయితే ఆ పాత్ర విషయంలో జరిగిన ఓ విషయం ఇటీవల బయటకు వచ్చింది.

గ్రాఫిక్స్ కొంపముంచాయా?

అవంతిక పాత్రకు సంబంధించిన గ్రాఫిక్ వర్క్ ఓ సంస్థకు అప్పగించారట. తీరా అవుట్ పుట్ చూశాక రాజమౌళి చాలా దారుణంగా ఉందని ఫీలయ్యారట. ఆ కారణంగానే అవంతిక పాత్రను మరోమారు ఆలోచించకుండా కత్తిరించి వేశాడనది ఇంటర్నల్ టాక్. అంతేకాకుండా బాహుబలి2 నిడివి కూడా బాగా పెరిగిపోవడంతో అవంతిక పాత్రపై కత్తెర పడాల్సిన పరిస్థితి ఏర్పడిందనే మరో వాదన. ఏదీ ఏమైనా బాహుబలి2 రికార్డులు తిరగరాస్తున్న వేళ.. ఇలాంటి రూమర్లు వినిపించడం సినీ వర్గాల్లో చర్చనీయాంశమైంది.