జై లవకుశ‌లో ఎన్టీఆర్ గెటప్ లీక్.. హరికృష్ణ గెస్ట్ రోల్!

షూటింగ్‌లో హరికృష్ణ

దర్శకుడు బాబీ డైరెక్షన్‌లో రూపొందుతున్న ఈ చిత్రానికి జై లవకుశ పేరు ప్రచారంలో ఉన్నది. ఈ చిత్రంలో ఎన్టీఆర్ త్రిపాత్రాభినయం చేస్తున్నారు. ఈ చిత్రంలో ఎన్టీఆర్ పోషించే పాత్రల పేరు జై, లవ, కుశ. ఈ పేర్లను ధ్రువీకరించే విధంగా ఓ ఫోటో బయటకు వచ్చింది. ఈ చిత్ర షూటింగ్‌లో తండ్రి హరికృష్ణతో ఎన్టీఆర్ మాట్లాడుతున్న ఫొటో బయటకు వచ్చింది. ఎన్టీఆర్ ముందు ఉన్న ఎన్ లవకుమార్ అనే నేమ్ ప్లేట్ స్పష్టంగా కనిపిస్తున్నది.

రామోజీ ఫిలిం సిటీలో .

ఈ చిత్ర కోసం రామోజీ ఫిలిం సిటీలో ప్రత్యేకంగా సెట్ వేశారు. ఈ సెట్‌ను హరికృష్ణ గురువారం సందర్శించారు. ఈ సందర్భంగా సెట్ ప్రాధాన్యతను, కథను, షూటింగ్ విశేషాలను చిత్ర యూనిట్ హరికృష్ణకు వివరించినట్టు సమాచారం.

ట్రిపుల్ రోల్..

ఈ చిత్రంలో ఆచారీ, పోలీసు అధికారి, ఓ విలన్ పాత్రను ఎన్టీఆర్ పోషిస్తున్నట్టు వార్తలు వెలువడుతున్నాయి. ఆ వార్తలను బట్టి పోలీస్ అధికారి పాత్ర పేరు ఎన్ లవ కుమార్ అనే విషయం స్పష్టమవుతున్నది. విలన్ ఛాయలున్న పాత్ర కోసం ప్రత్యేకంగా హాలీవుడ్ నుంచి మేకప్ మెన్‌ను రప్పించారు.

అద్భుతమైన కథ.. 100 కోట్ల బడ్జెట్

ఈ చిత్ర విశేషాలు కల్యాణ్ రామ్ తెలియచేస్తూ .. బాబీ అద్భుతమైన కథను రూపొందించారు. ఎన్టీఆర్‌లో ఉన్న నటుడికి, కథకు న్యాయం చేకూర్చడానికి ఖర్చుకు వెనుకాడటం లేదు అని అన్నారు. రూ.100 కోట్లకు పైగా బడ్జెట్‌తో ఈ చిత్రాన్నిరూపొందిస్తున్నట్టు సమాచారం.

రాశీఖాన్నాతో సయ్యాట..

దేవీ శ్రీ ప్రసాద్ సంగీతం అందిస్తున్న ఈ చిత్రంలో రాశీ ఖాన్నా హీరోయిన్. మరో హీరోయిన్ కోసం నివేదా థామస్ పేరును పరిశీలిస్తున్నట్టు తెలిసింది. ఈ చిత్రంలో కల్యాణ్ రామ్, తండ్రి హరికృష్ణ కూడా ప్రత్యేక పాత్రల్లో కనిపించనున్నట్టు సమాచారం.