Singer KK మృతిపై అనుమానాలు.. తల, ముఖంపై గాయాలు!

సీసీటీవీ ఫుటేజ్ స్వాధీనం

హిందీ సహా దక్షిణాదిలో అనేక సినిమా పాటలు పాడి మంచి క్రేజ్ సంపాదించిన కృష్ణ కుమార్ కున్నత్ అలియాస్ కేకే హఠాన్మరణం ఇప్పుడు భారత సినీ పరిశ్రమ మొత్తాన్ని తీవ్ర విషాదంలోకి నెట్టి వేసింది. కేకే హఠాన్మరణం పై ఇప్పుడు కొత్త అనుమానాలు ఏర్పడిన నేపథ్యంలో పోలీసులు ఆయనది అనుమానాస్పద మృతి కింద కేసు నమోదు చేసినట్లు సమాచారం. ఆయన పాల్గొన్న స్టేజ్ షో దగ్గర సీసీటీవీ ఫుటేజ్ సైతం స్వాధీనం చేసుకున్న పోలీసులు దానిని పరిశీలిస్తున్నారని తెలుస్తోంది.

బ్లాక్ స్పాట్స్

దీనికి తోడు ఈ వ్యవహారంలో రాజకీయ నేతలు కూడా ఎంట్రీ ఇచ్చారు. సరైన వసతులు లేక కేకే మరణించారు అంటూ పశ్చిమ బెంగాల్ బీజేపీ నేతలు ఆరోపిస్తున్నారు. కేకే మృతదేహాన్ని పరిశీలించిన వైద్యులు ఆయన ముఖం మీద, తల పైన గాయాలు, ఉన్నాయని గుర్తించారని బహుశా గుండెపోటు కారణంగా పడిపోయినప్పుడు ఆయనకు ఈ గాయాలు తగిలిన ఉంటాయని వారు అంచనాకు వచ్చినట్టు తెలుస్తోంది. ఇక పోలీసులు కూడా కేకే తలపై అలాగే పెదవులపై కొన్ని బ్లాక్ స్పాట్స్ గుర్తించారని తెలుస్తోంది.

గుండె నొప్పిగా ఉందని

ఈ నేపథ్యంలోనే పోస్టుమార్టం రిపోర్టు కోసం ఎదురు చూస్తున్న పోలీసులు ఆయన బస చేసిన హోటల్ స్టాఫ్, అలాగే ఈవెంట్ ఆర్గనైజర్స్ ను కూడా అదుపులోకి తీసుకుని విచారణ చేస్తున్నారని తెలుస్తోంది. ఇక కేకే మృతదేహం ప్రస్తుతం కలకత్తా మెడికల్‌ రీసెర్చ్‌ ఇన్‌స్టిట్యూట్‌ లో ఉంది. తనకు గుండె నొప్పిగా ఉందని కేకే చెప్పిన వెంటనే ఆయనను ఆసుపత్రికి తరలించారు. కాకపోతే ఆస్పత్రికి తరలించే సమయానికే ఆయన మృతి చెందినట్లు వైద్యులు ప్రకటించారు.

మరేదైనా కారణం ఉందా

ప్రస్తుతానికైతే పోలీసులు అనుమానాస్పద మృతి కింద కేసు నమోదు చేశారు. ప్రాథమికంగా అయితే ఆయనకు గుండెపోటు వచ్చిందని భావిస్తున్నారు. కానీ పోస్టుమార్టం రిపోర్ట్ వచ్చిన తర్వాతే ఆయన మరణానికి సంబంధించి పూర్తి వివరాలు తెలిసే అవకాశం కనిపిస్తోంది. పోలీసులు అనుమానం వ్యక్తం చేస్తున్న నేపథ్యంలో ఆయన సహజ మరణం అయినా లేక మరేదైనా కారణం ఉందా అనే విషయం మీద కూడా ఇప్పుడు చర్చ జరుగుతోంది.

ముంబైలో కేకే అంత్యక్రియలు

ఇప్పటికే కేకే మరణ వార్త గురించి తెలుసుకున్న కుటుంబ సభ్యులు కలకత్తా చేరుకున్నారు. కేకే మృతదేహానికి పోస్టుమార్టం పూర్తయిన తర్వాత డెడ్బాడీని కుటుంబ సభ్యులకు అప్పగించే అవకాశం కనిపిస్తోంది. ముంబైలో కేకే అంత్యక్రియలు జరిగే అవకాశం ఉన్నట్లు చెబుహతున్నారు. భౌతిక కాయాన్ని ముంబైకు తరలించనున్న సమయంలో విమానాశ్రయంలో పశ్చిమ బెంగాల్‌ ప్రభుత్వం గన్‌ సెల్యూట్‌ చేయనుందని సీఎం మమతా బెనర్జీ ప్రకటించారు.