ప్రభాస్ 'మిర్చి' ఆడియో రిలీజ్ (ఫోటోలతో)

దేవిశ్రీ ప్రసాద్‌ సంగీతం అందించిన ఈ చిత్రంలోని గీతాలు హైదరాబాద్‌లో విడుదలయ్యాయి. తొలి సీడీని కృష్ణంరాజు ఆవిష్కరించారు. ఎస్‌.ఎస్‌.రాజమౌళి అందుకొన్నారు. కృష్ణంరాజు, ఆయన సతీమణి శ్యామలాదేవి ట్రైలర్‌ని ఆవిష్కరించారు.

రాజమౌళి మాట్లాడుతూ ''ఎవరినైనా ప్రభాస్‌ డార్లింగ్‌ అనే పిలుస్తాడు. ఆ పిలుపు మనస్ఫూర్తిగా ఉంటుంది. 'మిర్చి' పాటలు బాగున్నాయి. ఈ వేడుక చూస్తుంటే సగం భీమవరం తరలి వచ్చినట్టు ఉంది''అన్నారు.

వినాయక్‌ ప్రసంగిస్తూ ''మంచి మనిషి ప్రభాస్‌. స్నేహానికి విలువ ఇస్తాడు. స్నేహితుల కోసమే ఈ సినిమా చేశాడు. మిర్చి కంటే కారంగా ఉండే సినిమా. కొరటాల శివ కథ బాగా చెబుతాడు. 'బిల్లా'లో ప్రభాస్‌, అనుష్కల జంట చూడముచ్చటగా కుదిరింది. ఈ సినిమా అంతకు రెట్టింపు వినోదాన్ని పంచాలి'' అన్నారు.

''అభిమానుల ప్రేమే మాలో ఉత్సాహాన్ని నింపుతోంది. ఈ వేడుక చూస్తుంటే సంక్రాంతి పండుగ ముందే వచ్చేసినట్టుంది. గుంటూరు మిరపకాయ్‌లాంటి సినిమా ఇది. చాలా వైవిధ్యంగా ఉంటుంది. పాటలు బాగున్నాయి'' అని కృష్ణంరాజు చెప్పారు.

ప్రభాస్‌ మాట్లాడుతూ ''టీజర్‌ అభిమానులకు తప్పకుండా నచ్చుతుంది. ఈ సినిమా నిర్మాతలు నాకు మంచి స్నేహితులు. వాళ్ల కోసం ఈ సినిమా చేశా. శివ సంభాషణల రచయితగా మంచి గుర్తింపు తెచ్చుకొన్నాడు. అతను పని చేసిన సినిమాలు మంచి విజయం సాధించాయి. ఈ సినిమాతో దర్శకుడిగానూ నిరూపించుకొంటాడు''అన్నారు.

దేవిశ్రీ మాట్లాడుతూ ''ప్రభాస్‌తో నా నాలుగో సినిమా. పాటలు అందరికీ నచ్చుతాయి'' అన్నారు.

‘‘ప్రభాస్‌తో నాకిది రెండో సినిమా. తనతో సినిమా చేస్తుంటే సొంత మనిషితో చేస్తున్నట్లుగా ఉంటుంది'' అని అనుష్క చెప్పారు.

ఈ చిత్రం ఆడియో వేడుకలో ఎం.శ్యాంప్రసాద్‌రెడ్డి, వీవీ వినాయక్ తదితరులు అతిథులుగా పాల్గొన్నారు.

మిర్చి సినిమా ఆడియో విడుదల వేడుకలో అపశృతి చోటు చేసుకుంది. వేడుకకు పాస్‌లు జారీ చేసిన సంఖ్యకు మించి ప్రభాస్‌ అభిమానులు చేరుకున్నారు. అప్పటికే ఆడియో విడుదల ప్రాంగణం వేలాది మంది అభిమానులతో కిక్కిరిసింది. లోపల ఖాళీ లేదంటూ పోలీసులు లోపలికి అనుమతించకపోవడంతో అభిమానులు వాగ్వాదానికి దిగారు. కొందరు రాళ్లు రువ్వడంతో పలువురు పోలీసులకు గాయాలయ్యాయి. అప్రమత్తమైన పోలీసులు వెంబడించడంతో ఆందోళనకు దిగిన వారంతా చెల్లాచెదురుగా పారిపోయారు.