సినిమా హిట్: పార్టీ చేసుకున్న హీరో హీరోయిన్ (ఫోటోలు)

లూటేరా చిత్రం ఒ నిశ్శబ్దమైన ప్రేమకథా చిత్రం. 1950 ప్రాంతంలో పశ్చిమబెంగాల్‌లోని మానిక్‌పూర్ అనే పల్లెటూరు నేపథ్యంలో ఈ సినిమా కథ సాగుతుంది. ఆ ఊళ్లో ఏళ్లనాటి జమీందారీ వంశం. స్వాతంత్య్రానంతరం జ మీందారీ గిరీ పోయి- ఒంటరిగా మిగిలిన జమీందార్. ఆయన కూతురు పాఖీ (సో నాక్షి సిన్హా). ఆ చుట్టుపక్కల ప్రాంతమంతా ఒకనాడు చక్రవర్తుల ఏలుబడిలో వైభవోపేత చరిత్రతో అలరారింది. దీంతో ఆర్కియాలజీ డిపార్ట్‌మెంట్ వాళ్లు ఈ ప్రాంతంలో తవ్వకాలు జరపటానికి ఆర్కియాలజిస్ట్ వరుణ్ (రణవీర్ సింగ్)ని పంపిస్తుంది.

శిథిలమై పోయిన చరిత్రని వెలికి తీస్తూండగా.. వరుణ్‌కి పాఖీ పరిచయ మవుతుంది. ఆమె అద్భుతంగా పెయింటింగ్స్ వేస్తుంది. కమ్మగా పాడుతుంది. జీవితాల్ని కథలుగా మలుస్తుంది. నవలలు రచిస్తుంది. పేజీలకొద్దీ మాటల్ని ప్రేమగా ఆరాధిస్తుంది. ఈ క్రమంలో ఇద్దరి మధ్య ప్రేమ మొదలవుతుంది.

జమీందార్ భవంతిలోని పురాతన వస్తువులన్నీ ఈస్టిండియా కంపెనీ ఇచ్చిందన్న అభియోగంపై వాటిని ఆర్కియాలజీ డిపార్ట్‌మెంట్ వాళ్లు స్వాధీనం చేసుకుంటారు. అయితే ఇదంతా వరుణ్ అండ్ గ్యాంగ్ చేసిన మోసమే అని తెలిసేలోపే అతను అక్కడి నుంచి జంప్ అవుతాడు.

మోసపోయాననే విషయం తెలుసుకుని జమీందారు గుండెపోటుతో మరణిస్తాడు. తండ్రి చనిపోవటంతో ఒంటరిదైన పాకీ డల్హౌసీ చేరుతుంది. వరుణ్ అసలు స్వరూపం ఏమిటి? అతడు చేస్తున్నదేమిటి? చివరికి వరుణ్ పాఖీని చేరాడా? అనే విషయాలు ఆసక్తికరంగా ఉంటాయి.

ఈ సినిమాలో మనసును హత్తుకునే కాన్సెప్టు ఒకటుంది. చెట్టుకున్న ఒక్క పండుటాకు రాలితే.. తన బతుకులో చిట్టచివరి ఘట్టం వస్తుందని హీరోయిన్ ‘ఆశ'గా ఎదురుచూట్టం.. ఆ ‘చిగురుటాకు' రాలకపోవటం, ఆకు రాలిపోకుండా హీరోచేసే ప్రయత్నం ఆకట్టుకుంటుంది.

లూటరా సినిమా చూస్తుంటే సత్యజిత్ రాయ్, గురుదత్ కాలం నాటి సినిమా ఏదైనా చూస్తున్నామా అన్న అనుభూతి కలుగుతుంది. సినిమాటోగ్రఫీ కూడా అప్పటి సినిమాలను గుర్తు తెచ్చే విధంగా ఉండటం గమనార్హం.

లూటేరా విజయంతో చిత్ర యూనిట్ సభ్యులు ఆనందంలో మునిగి పోయారు. అంతా కలిసి పార్టీ చేసుకున్నారు. ఈ కార్యక్రమం ఇటీవల ముంబైలో సందడిగా సాగింది. ఈ వేడుకకు సోనాక్షి తండ్రి శతృజ్ఞ సిన్హా కూడా హాజరయ్యారు.