రంగా విషయం లో మరీ ఇంత దిగాజారుడా: వర్మ వ్యాఖ్యల మీద నిరసన పెరుగుతోంది

ఫేస్‌బుక్‌లో పోస్ట్

నిన్న విజయవాడలో వంగవీటి రంగా కుటుంబం పోలీస్ స్టేషన్‌లో కింద కూర్చుని ఉన్న ఫొటోలను తన ఫేస్‌బుక్‌లో పోస్ట్ చేసి.. కొన్ని వివాదాస్పద రాతలకు రాంగోపాల్ వర్మ తెరలేపాడు. ఈ ఫొటోలపై దర్శకుడు రాంగోపాల్ వర్మ ఇలా కామెంట్ చేశాడు. తనకు వంగవీటి భార్య, కొడుకు అంటే ఎనలేని ప్రేమ అంటూ వర్మ వెటకారపు పోస్ట్ పెట్టాడు.

వంగవీటి రంగా స్వర్గంలో బ్రేక్ డ్యాన్స్

అంతేకాదు, స్టేషన్‌లో ఇలా కూర్చున్నందుకు వంగవీటి రంగా తన భార్య, కొడుకు పట్ల ఎంతో గర్వంగా ఫీలవుతాడని, స్వర్గంలో బ్రేక్ డ్యాన్స్ కూడా వేస్తాడని పోస్ట్ పెట్టి రాంగోపాల్ వర్మ సరికొత్త వివాదాన్ని సృష్టించాడు. తల్లి ఎందుకు నల్లగా ఉందో, కొడుకు ఎందుకు తెల్లగా ఉన్నాడో లోరియల్ కాస్మొటిక్ కంపెనీ చెప్పాలని వర్మ చేసిన పోస్ట్‌పై పెనుదుమారమే రేగుతోంది.

సహకరించకపోవడమే

రాంగోపాల్ వర్మ వంగవీటి చిత్రాన్ని తెరకెక్కించే సమయంలో ఆ కుటుంబం అతనికి సహకరించకపోవడమే ఈ వికృతానందానికి కారణమని నెటిజన్లు భావిస్తున్నారు.బెజవాడ వైసీపీలో అంతర్గత విభేదాలు భగ్గుమన్న నేపథ్యంలో నిన్న జరిగిన పరిణామాల గురించి తెలిసిందే.

రంగా భార్య రత్నకుమారి

వైసీపీ బహిష్కృత నేత గౌతమ్ రెడ్డి రంగా, రాధా హత్యలకు సంబంధించి చేసిన వ్యాఖ్యలు పెను దుమారాన్నే రేపాయి. విజయవాడలో నిన్న రంగా కుమారుడు రాధా, రంగా భార్య రత్నకుమారిలను ఉద్రిక్తతలు చోటుచేసుకుంటాయన్న కారణంగా పోలీసులు అదుపులోకి తీసుకున్నారు. పోలీస్ స్టేషన్‌లో రంగా భార్య రత్నకుమారి, కొడుకు రాధా కింద కూర్చుని నిరసన వ్యక్తం చేశారు. ఈ సమయంలో రాధా చొక్కా గుండీలు ఊడిపోయి ఉన్నాయి.