డబ్బున్న స్టార్ల వారసులదే హవా! (ఫోటో ఫీచర్)

By Bojja Kumar

Updated: Thursday, June 26, 2014, 12:10 [IST]

హైదరాబాద్ : యువ రాజులకే రాజ్యాధికారం, వారసులే కింగ్స్. ఇదే సంస్కృతి కొనసాగుతోంది తెలుగు సినీ పరిశ్రమలో. ఇక్కడ ధనవంతులైన స్టార్ల వారుసులదే హవా. వారికి మాత్రమే స్టార్ హీరోలుగా ఎదిగేందుకు పుష్కలమైన అవకాశాలు. హిట్టు, ప్లాపు అనే తేడా లేకుండా దినదినప్రవర్థమానంగా వారి ఎదుగుదల ఉంటుంది. పరిశ్రమలో స్టార్స్‌గా ఎదిగిన పలువురు వారసత్వ హీరోలను చూస్తే ఈ విషయం స్పష్టమవుతుంది.

ప్రస్తుతం తెలుగు సినిమా పరిశ్రమలోని టాప్ హీరోలే అందుకు నిదర్శనం. ఈ స్టార్స్ అంతా ధనవంతమైన కుటుంబాల నుంచి వచ్చిన వారే. పైగా బలమైన సినీ బ్యాగ్రౌండ్. వీరందరూ కూడా ఒకప్పుడు హీరోలైన వారి కుమారులు, నిర్మాత పుత్రరత్నాలే కావడం గమనార్హం.

అయితే ఈ ట్రెండు కేవలం ఇప్పుడు ప్రారంభమైంది కాదు. ఈ వారసత్వ పోకడలు బాలకృష్ణ, వెంకటేష్, నాగార్జున తెర్రంగేటం చేసిన 80ల్లో మొదలైందే. ఇప్పుడు వాళ్ల వారసులు కూడా అదే ఫాలో అవుతూ ఫ్యామిలీలకు ఫ్యామిలీలే సినీ పరిశ్రమలో తమ హవా కొనసాగిస్తున్నారు. పవన్ కళ్యాణ్, మహేష్ బాబు, అల్లు అర్జున్, రామ్ చరణ్, నాగ చైతన్య, ఎన్టీఆర్, ప్రభాస్, నితిన్, రానా దగ్గుబాటి, మంచు మనోజ్, అల్లరి నరేష్ అంటి వారు ఇందుకు ఉదాహరణ.

అయితే ఇక్కడ గమనించాల్సిన ఓ విషయం ఉంది. ఇక్కడ వారసత్వంలో సినిమాల్లోకి సులభంగా ఎంటరైనవారు చాలా మందే ఉన్నప్పటికీ, పోటీని తట్టుకుని విజయవంతంగా స్టార్ ఇమేజ్ సొంతం చేసుకున్న వారు మాత్రం కొందరు మాత్రమే. ప్రస్తుతం స్టార్ హీరోలుగా కొనసాగుతున్న వారు టాలెంటుతోనే ఈ స్థాయికి చేరుకున్నారు అనడంలో ఎలాంటి సందేహం లేదు.