అమరవీరుల కోసం ఇళ్ళు కట్టించాడు :సైనికుల కోసం స్టార్ హీరో నివాళి ఇలా

అమరవీరుల కుటుంబాలకు

ఇంతకుముందే ఛత్తీస్ గఢ్ సుక్మా జిల్లాలో మావోయిస్టు ఎన్ కౌంటర్ లో ప్రాణాలు కోల్పోయిన 12 మంది సీఆర్ఫీఎఫ్ సైనికుల కుటుంబాలకు స్టార్ హీరో అక్షయ్ కుమార్ 1.08 కోట్ల రూపాయల విరాళం ప్రకటించిన విషయం తెలిసిందే. ఇప్పుడు ఇదే తరహాలో అమరవీరుల కుటుంబాలకు తనవంతు సాయం చేసేందుకు మరో స్టార్ యాక్టర్ ముందుకొచ్చాడు.

వివేక్ ఒబెరాయ్

ఆ రియల్ హీరో మరెవరో కాదు.. తెలుగులో రక్తచరిత్ర సినిమాతో తనదైన ముద్ర వేసిన బాలీవుడ్ స్టార్ హీరో కమ్ క్యారెక్టర్ ఆర్టిస్ట్ వివేక్ ఒబెరాయ్. తెలుగు ప్రజలకు బాగానే సుపరిచితుడైన ఈ టాలెంటెడ్ నటుడు తాజాగా మహారాష్ట్రలోని థానేలో సెంట్రల్ రిజర్వు పోలీస్ ఫోర్స్ (సీఆర్ఫీఎఫ్) అమర సైనికుల కుటుంబాలకు 25 ఫ్లాట్లు దానం చేయనున్నట్లు ప్రకటించాడు.

కరమ్ ఇన్‌ఫ్రాస్ట్రక్చర్స్

దేశం కోసం ప్రాణాలు కోల్పోయిన సీఆర్‌పీఎఫ్ అమరుల కుటుంబాలకు తన కంపెనీ కరమ్ ఇన్‌ఫ్రాస్ట్రక్చర్స్ తరపున 25 ఫ్లాట్లు నిర్మించి ఇవ్వాలని అనుకుంటున్నట్టు లేఖలో పేర్కొన్నాడు. ఈ మేరకు ఎంపిక చేసిన అమరుల కుటుంబాల పేర్లతో కరమ్‌ ఇన్‌ఫ్రాస్ట్రక్చర్‌ ఓ జాబితాను విడుదల చేసింది.

ప్రశంసల జల్లు

కాగా, ఇప్పటికే నాలుగు ఫ్లాట్లు అందించినట్టు తెలుస్తోంది. ఇప్పుడు ఫ్లాట్ల కోసం ఎంపిక చేసిన కుటుంబాల పేర్లతో కూడిన జాబితాను విడుదల చేశారు. దీంతో వివేక్ ఒబెరాయ్ తీసుకున్న ఈ తాజా నిర్ణయంపై పలువురు హర్షం వ్యక్తం చేశారు. అంతేకాకుండా వివేక్ పై అందరూ ప్రశంసల జల్లు కురిపిస్తున్నారు.

‘వివేగం’ లో మెయిన్ విలన్ గా

ఇకపోతే, వివేక్ ఒబెరాయ్ ప్రస్తుతం సౌత్ లో తమిళ స్టార్ హీరో అజిత్ కుమార్ లేటెస్ట్ మూవీ ‘వివేగం' లో మెయిన్ విలన్ గా నటిస్తున్నాడు. ఇదిలా ఉంటే, అక్షయ్ కుమార్, వివేక్ ఒబెరాయ్ తో పాటు సల్మాన్ ఖాన్ లాంటి హీరోలు కూడా అక్కడ ఇలా దానధర్మాలు చేస్తూ మంచి పేరునే సంపాదిస్తున్నారు. మరి మిగిలిన స్టార్ హీరోలు కూడా ఇలాంటి విషయాల్లో ముందుకు వస్తారో లేదో ముందుముందు చూడాలి.