Happy Father's Day: తండ్రి కొడుకు కలిసి నటించిన సినిమాలివే.. ఆ రికార్డు మాత్రం మహేశ్, నాగార్జునదే

బాలయ్యను తీసుకొచ్చిన ఎన్టీఆర్

నందమూరి బాలకృష్ణ 14వ ఏటనే 'తాతమ్మకల' అనే సినిమాతో బాల నటుడిగా పరిచయం అయ్యారు. దీన్ని తెరకెక్కించింది, ఇందులో హీరోగా నటించింది ఆయన తండ్రి ఎన్టీఆరే. దీని తర్వాత 'అన్నాదమ్ముల అనుబంధం', 'వేములవాడు భీమకవి', 'దాన వీర సుర కర్ణ', 'అక్బర్ సలీం అనార్కలీ', 'వీరబ్రహ్మేంద్ర స్వామి చరిత్ర' వంటి చిత్రాల్లో కలిసి చేశారు.

నాగార్జునతో ఏఎన్నార్ సినిమాలు

అక్కినేని నాగార్జున కూడా తన తండ్రి అక్కినేని నాగేశ్వర్రావు నటించిన రెండు చిత్రాల్లో చైల్డ్ ఆర్టిస్టుగా నటించాడు. హీరోగా మారిన తర్వాత 'కలెక్టర్ గారి అబ్బాయి', 'అగ్నిపుత్రుడు', 'రావుగారిల్లు', 'ఇద్దరూ ఇద్దరే', 'మనం' వంటి చిత్రాల్లో వీళ్లిద్దరూ కలిసి స్క్రీన్ షేర్ చేసుకున్నారు. వీటిలో చాలా వరకూ సూపర్ డూపర్ హిట్ అవడంతో వీళ్ల కాంబోకు పేరొచ్చింది.

మహేశ్‌ను పరిచయం చేసిన కృష్ణ

సూపర్ స్టార్ కృష్ణ.. మహేశ్ బాబును 'నీడ' అనే సినిమాలో చైల్డ్ ఆర్టిస్టుగా పరిచయం చేశారు. ఆ తర్వాత వీళ్లిద్దరూ కలిసి 'పోరాటం', 'శంఖారావం', 'బజారు రౌడీ', 'గూడఛారి 117', 'కొడుకు దిద్దిన కాపురం', 'అన్నా తమ్ముడు', 'బాలచంద్రులు' అనే మూవీలు చేశారు. ఇక, 'ముగ్గురు కొడుకులు' మూవీలో కృష్ణ మరో కొడుకు రమేశ్ కూడా నటించాడు.

కొడుకులిద్దరితోనూ మోహన్ బాబు

డైలాగ్ కింగ్ మోహన్ బాబు కూడా తన ఇద్దరు కొడుకులను సినిమా పరిశ్రమకు పరిచయం చేశారు. అందులో మంచు మనోజ్ 'మేజర్ చంద్రకాంత్' సహా పలు చిత్రాల్లో చైల్డ్ ఆర్టిస్టుగా చేశాడు. అలాగే, విష్ణు హీరోగా అయిన తర్వాత మోహన్ బాబుతో కలిసి 'రౌడీ' అనే సినిమాలో నటించాడు. అలాగే, మనోజ్ 'పాండవులూ పాండవులూ తుమ్మెద' అనే చిత్రంలో కలిసి నటించారు.

రామ్ చరణ్‌.. చిరంజీవి చిత్రాలు

మెగాస్టార్ చిరంజీవి కూడా తన కుమారుడిని సినిమాల్లోకి పరిచయం చేశారు. అతడు నటించిన 'మగధీర'లో ఓ పాటలో గెస్ట్ అప్పీరెన్స్ ఇచ్చిన చిరంజీవి.. ఆ తర్వాత 'బ్రూస్‌లీ'లోనూ స్పెషల్ రోల్ చేశారు. ఇక, చిరంజీవి నటించిన 'ఖైదీ నెంబర్ 150'లో రామ్ చరణ్ ఓ పాటలో డ్యాన్స్ చేశాడు. అలాగే, ఇటీవలే వీళ్లు 'ఆచార్య'లో కలిసి నటించిన విషయం తెలిసిందే.

పెదనాన్నతో ప్రభాస్ సినిమాలు

పాన్ ఇండియా స్టార్ ప్రభాస్‌కు కృష్ణంరాజు పెదనాన్న అవుతారన్న విషయం తెలిసిందే. వీళ్లిద్దరూ గతంలో 'బిల్లా', 'రెబెల్' వంటి చిత్రాల్లో కలిసి నటించారు. అయితే, ఈ రెండూ దురదృష్టవశాత్తూ పరాజయం పాలయ్యాయి. ఇక, ఇటీవలే 'రాధే శ్యామ్'లోనూ స్క్రీన్ షేర్ చేసుకున్నారు. ఇవి మాత్రమే కాదు.. ప్రభాస్ తన ఫ్యూచర్ ప్రాజెక్టుల్లోనూ ఆయన నటించనున్నారు.

మహేశ్, నాగార్జున క్రేజీ రికార్డులు

తమ తండ్రితో కలిసి నటించిన హీరోలు కొడుకులతోనూ కలిసి నటించిన సందర్భాలు టాలీవుడ్‌లో చాలా తక్కువే అని చెప్పాలి. అయితే, తన కొడుకు అక్కినేని అఖిల్ నటించిన 'అఖిల్', నాగ చైతన్య 'బంగార్రాజు'లో నాగార్జున నటించాడు. అలాగే, మహేశ్ బాబు తన కొడుకు గౌతమ్‌ను '1 నేనొక్కడినే' సినిమాతో పరిచయం చేశాడు. ఇలా ఈ స్టార్లు రికార్డును క్రియేట్ చేశారు.