రెండేళ్ల తరువాత ఓ ట్వీట్.. అది కూడా అన్యాయానికి వ్యతిరేకంగా.. ఆ డైరెక్టర్ రియల్ హీరో

తండ్రీ కొడుకులపై దారుణం..

తూత్తుకుడిలో జయరాజ్, ఫినిక్స్‌లపై పోలీసులు దారుణంగా ప్రవర్తించారు. లాక్ డౌన్‌లో తమ మొబైల్ షాపును అనుమతించిన సమయం కంటే కాసేపు ఎక్కువగా తెరిచి ఉంచినందుకు లాకప్‌లో వేసి చిత్రవదలు పెట్టారు. పోలీసులు థర్డ్ డిగ్రీ ప్రయోగించడంతో తండ్రీకొడుకులు మరణించారు.

గొంతెత్తిన సమాజం..

పోలీసుల ఆగడాలపై తమిళ సమాజం గొంతెత్తింది. సోషల్ మీడియాలో ఈ ఘటనను వైరల్ చేసి దేశమంతా స్పందించేలా చేశారు. జయరాజ్, ఫినిక్స్‌లకు న్యాయం చేయాలని డిమాండ్ చేశారు. తమిళ స్టార్ హీరోలు సైతం ఈ ఘటనపై ఫైర్ అయ్యారు. ఇందుకు కారణమైన పోలీసులను వదిలిపెట్టకూడదని, తగిన శిక్ష విధించాలని కోరారు.

కేసులో పురోగతి..

జయరాజ్, ఫినిక్స్ ఘటనపై స్వయంగా మద్రాస్ హైకోర్టు స్పందించింది. వెంటనే తగిన చర్యలు తీసుకోండని పోలీస్ డిపార్ట్‌మెంట్‌ను ఆదేశించింది. ఈ మేరకు ఇద్దరు పోలీసులను సస్పెండ్ చేయగా..మరో ఇద్దరిని ట్రాన్స్‌ఫర్ చేశారు. అయితే అది మాత్రమే చాలదని ప్రజలంతా రోడ్లపైకి వచ్చారు.

సీసీటీవీ పుటేజ్..

జయరాజ్, ఫినిక్స్ ఘటన సాధారణమైంది కాదని ప్రత్యేకంగా విచారించాలని మద్రాస్ ధర్మాసనం నిర్ణయించింది. నాటి ఘటనకు సంబంధించిన సీసీటీవీ పుటేజ్‌తో పాటు మూడు పేజీల రిపోర్ట్ కూడా సిద్దమైనట్టు తెలుస్తోంది. ఈ మేరకు ఓ మహిళా పోలీసాఫీసర్ ప్రత్యక్ష సాక్షిగా ఉండేందుకు ముందుకు వచ్చింది.

రెండేళ్ల తరువాత ట్వీట్..

రెండేళ్ల తరువాత వెట్రిమారన్ ఈ అంశంపై ట్వీట్ చేయడం అందర్నీ ఆశ్చర్యపరుస్తోంది. ఈ కేసులో ప్రత్యక్ష సాక్షిగా ఉండేందుకు ముందుకు వచ్చిన ఆఫీసర్ రేవతి, నిజాయితీగా పని చేస్తోన్న జడ్జ్‌లు ప్రకాష్, పుహళేంది, మెజిస్ట్రేట్ భారతిదాసన్ వీరంతా మాకు నమ్మకాన్ని కలిగించారని, తామంతా మీ వెంటే ఉంటామని పేర్కొన్నాడు.

రియల్ హీరో..

రెండేళ్ల తరువాత ఇలాంటి అంశంపై ట్వీట్ చేయడం, అది కూడా ఎంతో నిజాయితీగా నిక్కచ్చిగా పేర్కొనడంపై నెటిజన్లు ప్రశంసలు కురిపిస్తున్నారు. కొందరు నెటిజన్లు విసరణై సినిమాలో జరిగినట్టు ఉందని గుర్తు చేసుకుంటున్నారు. వెట్రిమారన్ రియల్ హీరో అంటూ కామెంట్స్ చేస్తున్నారు.