పేరు మార్చుకున్న విజయ్ దేవరకొండ.. అందులో పేరు చూసి అవాక్కవుతున్న రౌడీ ఫ్యాన్స్

అది మాత్రం బాగా నిరాశకు గురి చేసింది

విజయ్ దేవరకొండకు ‘అర్జున్ రెడ్డి' ఎంతో పాపులారిటీ సంపాదించి పెట్టింది. ఆ తర్వాత వచ్చిన ‘గీత గోవిందం' కూడా భారీ విజయాన్ని అందుకోవడంతో పాటు అతడికి మంచి పేరును తెచ్చి పెట్టింది. అదే సమయంలో విజయ్ మార్కెట్ కూడా భారీగా పెరిగిపోయింది. ఈ క్రమంలోనే వచ్చిన ‘డియర్ కామ్రేడ్' మాత్రం అతడిని బాగా నిరాశకు గురి చేసింది.

నలుగురు హీరోయిన్లను లవ్ చేస్తున్నాడు

ప్రస్తుతం విజయ్ దేవరకొండ ‘వరల్డ్ ఫేమస్ లవర్' అనే సినిమాలో నటిస్తున్నాడు. క్రాంతి మాధవ్ తెరకెక్కిస్తున్న ఈ సినిమాలో అతడు నలుగురు అమ్మాయిలను ప్రేమించే వ్యక్తిగా కనిపించనున్నాడు. కేఎస్ రామారావు సమర్పణలో క్రియేటివ్ కమర్షియల్స్ నిర్మిస్తున్న ఈ మూవీలో ఐశ్వర్య రాజేష్‌, రాశీ ఖన్నా, ఇజబెల్లె లైట్, కేథరిన్‌ హీరోయిన్లుగా నటిస్తున్నారు.

నాలుగు పాత్రలా.. నాలుగు వేరియేషన్లా.?

ఇటీవల విడుదల చేసిన హీరోయిన్లకు సంబంధించిన పోస్టర్లలో ఈ సినిమాలో విజయ్ నాలుగు గెటప్పుల్లో కనిపిస్తున్నాడు. దీంతో అతడు నాలుగు పాత్రలు చేస్తున్నాడా.? లేక.. నాలుగు వేరియేషన్లలో కనిపిస్తున్నాడా అన్న అనుమానాలు వ్యక్తం అవుతున్నాయి. లవర్స్ డే కానుకగా ఫిబ్రవరి 14న విడుదల కానున్న ఈ సినిమాపై అంచనాలు పెరిగిపోతున్నాయి.

పేరు మార్చుకున్న విజయ్ దేవరకొండ

‘వరల్డ్ ఫేమస్ లవర్' సినిమా టీజర్ శుక్రవారం విడుదలైన విషయం తెలిసిందే. ఈ టీజర్ మొత్తంలో ఓ ఆసక్తికర న్యూస్ తెరపైకి వచ్చింది. అదే.. ఇందులో విజయ్ తన పేరును మార్చుకోవడం. ఇప్పటి వరకు నటించిన సినిమాల్లో ‘విజయ్ దేవరకొండ' అని పేరు వేయించున్న ఈ యంగ్ హీరో.. ఇందులో మాత్రం ‘దేవరకొండ విజయ్ సాయి' అని మార్చుకున్నాడు.

అంచనాలు పెరిగాయి.. అవాక్కవుతున్నారు

ఈ టీజర్‌లో విజయ్ నాలుగు పాత్రల్లో కనిపిస్తున్నాడు. ముఖ్యంగా లవ్ ఫెయిల్ అయిన యువకుడిగా అద్భుతమైన నటనను కనబరుస్తున్నాడు. దీంతో ఈ సినిమాపై అంచనాలు పెరిగిపోతున్నాయి. అదే సమయంలో ఇందులో విజయ్ పేరు మార్చుకోవడంతో ఈ రౌడీ హీరో ఫ్యాన్స్ అవాక్కవుతున్నారు.