నిప్పురవ్వలా కాలా.. రజనీ.. హ్యాపీ బర్త్ డే.. కండక్టర్ టూ సూపర్‌స్టార్

కాలా సెకండ్ లుక్

కాలా చిత్రానికి సంబంధించిన రెండో పోస్టర్ ఇది. గతంలో ఓ పోస్టర్‌ను రిలీజ్ చేసిన సంగతి తెలిసిందే. నెరిసిన గడ్డం, జుట్టుతో కళ్లజోడు మాటున రజనీ తీక్షణమైన చూపు ఆకట్టుకొనే విధంగా ఉంది.

ధనుష్ ట్వీట్

సూపర్‌స్టార్ రజనీకాంత్ జన్మదినోత్సవం సందర్భంగా కాలా సినిమాలోని పోస్టర్‌ను రిలీజ్ చేస్తున్నాం అని ధనుష్ ట్వీట్ చేశారు. కాలా చిత్రానికి ధనుష్ నిర్మాతగా వ్యవహరిస్తున్న సంగతి తెలిసిందే. ఈ చిత్రాన్ని వండర్‌బార్ స్టూడియో బ్యానర్‌పై నిర్మిస్తున్నారు.

శరవేగంగా కాలా చిత్రం

కాలా చిత్ర షూటింగ్ శరవేగంగా జరుపుకొంటున్నది. ముంబైలోని మురికివాడల్లో ఇప్పటికే చిత్రీకరణ పూర్తి చేశారు. ప్రస్తుతం చెన్నైలో వేసిన ప్రత్యేక సెట్‌లో సన్నివేశాలను చిత్రీకరిస్తున్నారు. ఈ చిత్రంలో నానాపాటేకర్, హ్యూమా ఖురేషి, పంకజ్ త్రిపాఠి, సముద్రఖని తదితరులు నటిస్తున్నారు.

67 ఏళ్ల వయసులో దూసుకెళ్తున్న

67 ఏళ్ల వయసులోనూ రజనీకాంత్ యువ హీరోలా దూసుకుపోతున్నారు. ప్రస్తుతం రజనీకాంత్ నటించిన రోబో2.0 చిత్రం విడుదలకు సిద్ధంగా ఉంది. వచ్చే ఏడాది ఏప్రిల్‌ మూడోవారంలో ఈ చిత్రం విడుదల కానున్నది.

రోబో తర్వాతే కాలా

కాగా రోబో కంటే ముందే కాలా చిత్రం విడుదల కానున్నది అనే వార్తలను చిత్ర యూనిట్ కొట్టిపారేసింది. రోబో2.0 తర్వాతనే కాలా విడుదల అవుతుంది అని వారు పేర్కొన్నారు.

కండక్టర్‌ టూ సూపర్‌స్టార్

రజనీకాంత్ జన్మదినోత్సవం సందర్భంగా ఆయన గురించి కొన్ని విషయాలు.. కండక్టర్‌గా జీవన ప్రయాణం సాగించిన శివాజీరావు గైక్వాడ్.. ఆ తర్వాత నటుడిగా మారి రజనీకాంత్‌గా మారాడు. వరుస విజయాలతో దూసుకెళ్లి సూపర్‌స్టార్‌గా మారాడు.

డైలాగ్ కింగ్ రజనీ

అది ఏ సినిమా కథైనా అందులో ఒదిగిపోవడం రజనీకి వెన్నతో పెట్టిన విద్య. క్యారెక్టర్‌కు అనుగుణంగా పాత్రలో పరకాయ ప్రవేశం చేయడం రజనీ విలక్షణమైన శైలి. డైలాగ్ చెప్పడంలో ఆయనకు ఆయన సాటి. భాషా ఒక్కసారి చెబితే వందసార్లు చెప్పినట్టే.. దేవుడు శాసిస్తాడు.. ఈ అరుణాచలం పాటిస్తాడు అని ఆయన చెప్పిన డైలాగ్స్ ఫ్యాన్స్ ఇప్పటికీ ఫిదానే అవుతారు.

సూపర్ స్టార్ స్టయిల్

సినిమాల్లో సిగరెట్ తాగే విధానం అభిమానులను విశేషంగా ఆకట్టుకొంటుంది. సిగరెట్‌ను గాలిలో ఎగురవేసి నోటిలో పెట్టుకోవడం రజనీ సిగ్నేచర్ స్టయిల్. ఈ స్టయిల్‌కే ఎందరో పడిపోయి అభిమానులుగా మారారు. ఇలా రజనీ మరిన్ని సంవత్సరాలు ఫ్యాన్స్‌ను ఆకట్టుకోవాలని కోరుకొంటూ సూపర్‌స్టార్‌కు తెలుగు ఫిల్మీబీట్ జన్మదిన శుభాకాంక్షలు చెబుతున్నది.