బాబు గోగినేని పిచ్చిపట్టినట్టు.. గీతాపై అరుపులు.. కౌశల్‌, ఆమెను బయటకు పంపిస్తా!

బిగ్‌బాస్ ఆంక్షల తిరస్కరణ

బిగ్‌బాస్‌ కార్యక్రమం కొంత సందడిగానే మొదలైంది. నిన్నటి కొనసాగింపుగా బిగ్‌బాస్ విధించిన మూడు ఆంక్షలను ముగ్గురు సభ్యులు దీప్తి సునైన, నందిని, గణేష్ తిరస్కరించారు. కెప్టెన్ పదవికి పోటీ పడకుండా ఉండటం, సీజన్ మొత్తానికి సెల్ఫ్ నామినేట్ చేసుకోవడం, వచ్చే వారం కూడా సెల్ఫ్ నామినేషన్ చేసుకోవాలని సూచించిన సంగతి తెలిసిందే.

పూజాకు పాన్ షాప్ టాస్క్

కొత్తగా ఇంటిలోకి చేరిన పూజా రాంచంద్రన్‌కు కిళ్లీ దుకాణం టాస్క్ ఇచ్చారు. ఇంటిలోని పురుషులు పూజాను మచ్చిక చేసుకోవాలి. ఆడవాళ్లు ఆకట్టుకోవాలని టాస్క్‌లో రూల్ విధించారు. అమిత్, సామ్రాట్, గీతా మాధురి, కౌశల్, గణేష్ తదితరులు విచిత్ర వేషాధారణలతో కనిపించారు. రకరకాల ప్రయత్నాలు చేసి పూజను ఆకట్టుకునేందుకు తమ టాలెంట్‌ను ప్రదర్శించారు.

కెప్టెన్ పదవికి ఆ నలుగురు

పాన్ షాపు టాస్క్ ముగిసిన తర్వాత ఇంటి సభ్యులందరినీ హాలులో బిగ్‌బాస్ సమావేశపరిచారు. పాన్ షాప్ టాస్క్‌లో ఉత్తమ ప్రదర్శన ఇచ్చిన వారి నలుగురు సెలబ్రిటీల పేరు చెప్పమనగా సామ్రాట్, అమిత్, గీతా, దీప్తి నల్లమోతు పేర్లను పూజ చెప్పారు. దాంతో వారిని కెప్టెన్ టాస్క్‌కు అభ్యర్థులుగా నిర్ణయించారు.

విగ్రహంలా నిలబడిన నలుగురు

కెప్టెన్ టాస్క్ కోసం ఓ గద్దెపై నిలబడి విగ్రహంలా కనిపించాలన్నారు. గద్దె నుంచి కాలు కింద పెడితే వారు అనర్హులవుతారని బిగ్‌బాస్ రూల్ చెప్పాడు. దాంతో రకరకాల రంగులు శరీరానికి పూసుకొని టాస్క్‌లో భాగమయ్యారు. టాస్క్‌లో కౌశల్ అభ్యర్థులందరినీ ఏదో రకంగా ఇబ్బంది పెట్టేందుకు ప్రయత్నించారు.

దీప్తిని నెట్టిన బాబు గోగినేని

దీప్తి నల్లమోతును బాబు గోగినేని ఉద్దేశపూర్వకంగా నెట్టివేయడంతో టాస్క్ నుంచి బయటకు వచ్చింది. అలాగే సామ్రాట్, అమిత్‌ను కౌశల్ నెట్టివేయడంతో వారిద్దరూ కూడా పోటీకి అనర్హులయ్యారు. దాంతో గీతా కెప్టెన్‌గా గీతా మాధురి ఎంపికైంది.

నానికి ఫిర్యాదు చేసుకో

కెప్టెన్‌గా నీ ఇంటెన్షన్ బయటపెట్టి ఇంటి రెండు వర్గాలు విడగొడుతున్నావని బాబు గోగినేని రెచ్చిపోయాడు. దానికి గీతా గట్టిగానే సమాధానం ఇచ్చింది. నా మాటలు, నేను నచ్చకపోతే బిగ్‌బాస్, నాని, ఇంక ఎవరికైనా ఫిర్యాదు చేసుకోండి. కెప్టెన్‌గా నా నిర్ణయం నాదే. నా గేమ్ నేను ఆడుతున్నాను. నాకు మద్దతుగా నిలిచిన కౌశల్‌పై ఎవరూ మాట్లాడకూడదు అని కౌశల్, సామ్రాట్‌కు ఝలక్ ఇచ్చింది. దాంతో గురువారం ఎపిసోడ్ ముగిసింది.

గొడవ కొనసాగింపు

గురువారం ఎపిసోడ్ ముగిసినప్పటికి ఇంట్లో గీతా, బాబు గొడవ ప్రభావం కూడా కనిపించింది. గీతా కన్నీరు పెట్టుకోవడం కనిపించింది. ఏడుస్తున్న గీతాను దీప్తి ఊరడించడం జరిగింది. కౌశల్, గీతా మాధురిని ఇంటి నుంచి బయటకు పంపించడమే ఇక నా పని అని చివర్లో బాబు గోగినేని రెచ్చిపోయాడు. ఇలాంటి సీన్లకు పూర్తిగా శుక్రవారం ఎపిసోడ్‌లో వివరణ వచ్చే అవకాశం ఉంది.